Indira Gandhi-i asenok dang longjema alitsü sayu: Sonia Gandhi

Delhi, November 19, 2015: Linük nung mezüng Ato kilonser, Indira Gandhi asoba 98buba anogomung nung Tir, Pranab Mukherjee, tatong Tir, Mohd. Hamid Ansari, taoba Ato kilonser, Dr. Manmohan Singh aser tanga ketdangsertemi asür Indira indang Samadhi, Sarva Dharma Prarthana Sabha nung asür nem akhüm agütsüba noksa nung angur.

New Delhi, November 19 (Agencies): Brihostibar nü Congress Party Tir, Sonia Gandhi-i, Indira Gandhi-i linük dang longjema alitsü asenok dang sayu aser nüburtemi iba lenmang nungji jajatsüla, ta ashi.

India nung mezüng Ato kilonser, Indira Gandhi asoba anogomung 98buba nü Sonia Gandhi-i, “Asenoki Mahatma Gandhi, Indira Gandhi aser Maulana Azad nunger taküm otsü nungi aseni angazüktetba tashi angazüka benshitsüla. Indira Gandhi-i asenok dang longjema alitsü sayu,” ta ashi.

Delhi nung Indian Youth Congress convention sentong nung jembidang Sonia-i, “Lai (Indira) la takümji asen linük longjema alitsü atema bendanga agütsü,” ta ashi.

Sonia Gandhi-isa, asür Ato kilonser Indira Gandhi-i ajak kasasa züngshitsü aser kasa temeten atema noktak, ta ashiba den külemi la dak mangdang aliba aser la ajanga India nung Green Revolution adokdaktsüba atema asür nem tenüngsang agütsüogo.

Tanü taoba mapang Ato kilonser asoba anogomung nung Tir, Pranab Mukherjee, tatong Tir, Mohd. Hamid Ansari, taoba Ato kilonser, Dr. Manmohan Singh aser tanga ketdangsertemi Indira indang Samadhi, Sarva Dharma Prarthana Sabha nung la nem akhüm agütsüogo.