Indisen Ao Baptist Arogo CED-i Living Bread Ministry semdang

Dimapur, Oct. 24 (TYO) : October 22 anogo nung Indisen Ao Baptist Arogo Christian education department, Director-i anir tesayurtem aser tanur aika arua, Living Bread Ministry semdangba mapang sentong tajung ka yanglua agiogo.
Iba sentong nung CED director Kr. Esther-i pur memenepi aliba tanur aser medemertem den Funny J. Crosby taküm otsü agi atishia jembi, kechiaser la nükpoker süaka lai ken 9000 mejem aser tanü tashi tekülem balala nung lai mejemba kentem atener ta shisem.
“Nenoka tenüktelen nung tera agi tangar memenepaka Tsüngremi nenok nem agütsüba sempetji amshia Pa sentsüwangshidakjang” ta laisa ayongzük.
L. Temsü Jamir, Deacon-i ministry tenzüktetba asoshi pelaba metetdaktsü aser timtem tushi aika liaka arema inyakdaktsünüba olen tajung aika shisem aser Indisen Ao Baptist arogoi aria bilemba tangatetba nung onok yok ta ashi.
Iba sülen Living Bread Ministry züngsemtemi ken atenba mapang “Onok alima nung nükpok aser tsüngtsük süaka” kenübosa kotak nung angutsü/ jajatettsü ta teimla ken atendang tesenteper ajunga tanüla nung temoatsü angu.
Iba sentong nungsa Wb. S. Aosüngküm Ozükümi, ministry tenzükba otsü aser nükjidong telok den lemsatep aser Sp. Moasünep Aieri pelaa agizükba o jembi aser Sp. Saneni pa taküm kuli ashi.
Sentong ajak Kr Mentila Ozükümi kütdangsüa agir külen, Indisen Ao Baptist Arogo Christian education department-i bentsür aruba sempetlep ministry züngsem ajak nem akoa lemtsüba den külemi Ministry nem teyari osettsüset agütsüba sülen Kr. T.Bendangsangla, Asso pastor woman, Purana Bazar “B” Ao Baptist arogo ajanga sentong tembanga sarasadem.