Indisen & CTN arogo sannüker na ordain asü

Dimapur, Nov.08 (TYO) : November 08, 2015 Debar anogo nung ABAM kübok Indisen Baptist Arogo, Dimapur nung sannüker, Dr.T.Temjen Ozüküm aser Changtongya town Baptist Arogo nung sannüker, Wb.T.Yanger Longkumer na Tsüngrem tenzükba mapa nung pa aser par kibong rangben ano tali bendanga agütsür tenzüktsü asoshi November 8, 2105 nü ordain süogo.
Rev.Dr.T. Temjen Ozüküm ya Sungratsü nunger aser Indisen Baptist Arogo nung sannüker mapa 1999 küm May ita 16 nungi inyaker. Pa kinüngtsü Changkitsür, Wt.I.Bendangla-a theology azüngba tetsür tajung ka lir. Tena nem Tsüngremi jabaso 2 aser jala ka moaja lir. Pa Indisen arogo nung meinyakdang Mekuli Baptist Arogo nung küm ishika sannükba mapasa inyaka liasü.
Indisen ta asüba ya Dimapur nung Aortemi akümba yim tenüng tasen ka lir. Tamalenbo iba yim dang Ao Kashiram ta jaa liasü. Iba arogo nung kibong 350 shi lir.
Changtongya Town Baptist Arogo nunga sannüker Mr. T. Yanger Lkr ordination sentong November 8, 2015 anogo takok ngua agiogo. Iba sentong nung ABAM Ordination Council nungi Rev. Toshi Longchar, Rev. Toshimeren, Rev. Noklen. Longkumer, Rev. Lima Jamir aser Rev. Dr. M. Rongsen nungertemi shilem agia liasü.