Indisen nung Tsüngremmong kanga meraketa mongogo

Dimapur, August 01, 2017: Mongolbarnü Indisen nung Tsüngremmong benjong amongdang Indisen Lanur Telongjem-i shilem agiba mapang tangokba noksa nung angur.

Dimapur, August 01 (TYO): Mongolbarnü Indisen Lanur Telongjem, Dimapur-i ayongzüka Tsüngremmong benjongmong Indisen yim ground nung kanga tebor junga mongogo, aser iba sentong nung tongti tejaoker, Retd Additional Director, Land Resources Development, Wb. Moatoshi Longkumer liasü.
Iba sentong nung jembidang Moatoshi-i, asenoki sobaliba ya renteta yutet nungdang asen takum, libaliro nung renteta aotsü, anungji sobaliba meteta ayutsüji kanga dang nüngdaker kechiyong iba jagi asenokji kong nungi jakzüka aru mesüra kong nungi aruar aji jangjar, ta ashi.
Asen otsula oboula mapang nungi asenok sobaliba indang tezüluba nung maliasü. Anungji sobaliba otsü, yimya yimpong, libaliro, kenten menu ajunga tebang agi dang shia putu ka nungi putu ka nem belena bener aru. Iba yongji tanü asenok Tsüngremmong mesüra Moatsü mong nung tera melenshir tensa den apet aji benshia monga arur. Sobaliba ajakji tajung ta masü saka tajungtem ji shimteta benshia odi, ta paisa ashi.
Tanü Indisen lanurtemi sobaliba wazüka ayutsü nükjidong nung tanü Tsüngremmong benjongmong ayongzüka amongba ngur pelar, ta paisa shisem.
Tanü Naga lima jenjang reprangdangra kanga dang tesasatsü jenjang ka nung lir. Asen libaliroba ajak meshimetsü agi süngadokogo. Anungji lanurtemi anir asenok ajak melenshir asen lima yanglutsü merangdi, ta pai ayongzüka jembi.
Iba sentong nung Tsüngremmong ratet Phek Govt College Principal, Wb. L. Mefutiba-i metetdaktsü aser tayongzükba o Indisen Village Council Chairman, Wb. Saku Kichu-i jembi liasu. Iba sentong tenzüka Wb. K Sari Lkr-i sarasadem aser Youth Director, Indisen Baptist Arogo, Sp. Lima Jamir-i sarasadema sentong atem.