London, February 15, 2016 : India nunger, British film yanglur, Asif Kapadia-i kentener, asür Amy Winehouse taküm otsü dak ajemdaker yangluba documemtary, ‘Amy’ ajanga Best Documentary award nguogo. Iba documentary nung shilem agir aser yaritepertemi pa mapa nung tamang akaba atema pai pelaba metetdaktsüogo.
“‘Amy’ nung shilem agir aser teyariteper ajaki kü dang temulung alemba asoshi kanga pelar, Amy#EEBAFTAs @AmyFilmUK @AmyTheMovie,” ta iba award anguba sülen Kapadia-i twitter ajanga lemsatepa liasü.
Royal Opera House nung akaba award sentong nung Kapadia-i, Ajak liaka ajak ya Amy dak sa atemer. Onoki iba documentary yangludang la kanga meima aküm aser la taküm nung atalokbatem den lai ajangshiba ajak shitak dang enotsü meranga iba documentary yangluogo. Lai la sasa mazüokteti tera meshidak maküm tsüngda la tobur ajangba, tekolok ajungba aser nisung ajungba otsü alima nem metetdaktsütsü mechi nung onoki la indang documentary ya yanglu, ta ashi.
Kanga kara iba lima nung pilala, “Back to Black” kentenla indang documentary yanglutsü asoshi onoki la dak atalokba otsütem ajak takok tashi shitak bententsü meranga liasü.
La arishi küm 27 nung iba lima nungi pila.
Iba documentary ya “Cartel Land”, “He Named Me Malala”, “Listen to me Marlon”, aser “Sherpa” otsütem den külemi iba award asoshi tenüng benoka liasü aser ajak madak ‘Amy’ otsü tajungba ta shimteta iba award ya angu.
You must be logged in to post a comment Login