Indo-Myanmar arrtsü atsütsü sentong aliba Mizoram-i magizüker

Aizawl, Luroi/August 29 (Agencies): Mizoram Home Minister K. Sapdanga-i Brehostibarnü ashiba agi, Centre-i Mizoram nung Indo-Myanmar arrtsü atsütsü atema sentong yangluba ya sorkari magizüker.

State assembly nung jembiba mapang Sapdanga-i ashiba agi, international arrtsü atsütsüba ya Union sorkar tashi küboki aiter aser Centre-i iba ken o asadangtsü atema Assam Rifles den sendaktepa inyakdar.

Paisa, ali kibur ama Mizoram sorkari iba ken o süoki ia bilemba lemsatepogo, saka arrtsü nung aliba tesemtem achaayangtsüba dak sendakba nung Centre inyakyimtem pusemer ta ashi.

Minister-isa, 2024 küm February ita 28 nü Myanmar den arrtsü nung atsü atsütsü sentong aliba aser Free Movement Regime (FMR) aginba anema bangzüng agizükba indang lepshia jembi.

Iba bangzüng ajangsa Modi-i aniba sorkar dang linük balala nungi prokshia aliba Zo nungertem administrative unit ka kübok longjemdaktsütsü atema jenjang agitsü mepeshia liasü.

Sapdanga-i ashiba agi, state sorkari taoba mapanga arrtsü nung atsü atsütsü asoshi sentong aliba anemogo aser assembly o cabinet tamendakdak jangja metetdaktsütsü atema 2024 küm March ita Lok Sabha secretariat dangi aser 2024 küm April ita Home Ministry dangi shiti yokogo.

Mizoram aser Myanmar Chin state na arrtsü km 510 lir aser Mizo nunger aser Chin nunger ya shilu ka dang lir. Tang Chin state nung refugee 29,000 dak tema Myanmar nung jenoka lir, shirnok military-i sorkar atsüngba sülen jenshia oa liasü.

State sorkarisa Myanmar nunger aser Bangladesh kübok Chittagong Hill Tracts (CHT) nungi tejenokdak bushia aryr alirtem indang biometric enrollment agiogo.

Young Mizo Association (YMA) densema lokti tentet balalai arrtsü nung atsü atsütsü aser FMR agintsü telemtetba agiba anema nokdaka arudar.