Indo-Myanmar arrtsü nung ita 6 tashi aonung curfew alitsü ; Myanmar Army-i Northeast telungpurtem anema inyaktsü nangzük

Imphal/Guwahati, October 18 (Agencies): Manipur kübok Ukhrul, Chandel aser Churachandpur district tem nung Indo-Myanmar arrtsü anasa aonung curfew alitsü ozüng agütsüogo.
Indian Army aser Assam Rifles ketdangsertemi mepishiba ama ita trok tashi aonung curfew alitsü ketdangsertemi temelaba agütsü.
District asemprongla nungi magistrate temi pei pei district nung International arrtsü nungi tenzüker kilometer 3 telongtet nung nisung senzüsenbong masütsü tetuyuba agütsü, ta sorkar ketdangsertemi ashi.
Aonung curfew ji nikongtsütsü 5:00 ako nungi anepdang 5:00 ako tashi alitsü, ta parnokisa metetdaktsü.
Manipur nung international border anüktsü atema mapa lemzükja aliba Army aser Assam Rifles-i aonung curfew mapang arrtsü mittsü.
Ano, osang ka ajanga, November 8 nü general elections agiba sülen Myanmar-i North East telungpurtem anema mapa inyaktsü nangzükogo, ta metetdaktsü.
Tawa tu National Security Adviser, Ajit Doval aser Joint Intelligence Committee (JIC), Chairman, RN Ravi na Myanmar aodang Myanmar Army-i iba ya nangzük ta osang ajanga shisem.
Tawa Myanmar semdangi aodang NSA aser JIC nungertemi Myanmar Army Chief den ajurutepa senden agi aser iba mapang Myanmar nung India kübok Northeast telungpurtem jenoka aliba atema India-i khuret süa bilemba metetdaktsü, ta Centre sorkar ketdangser kari ashiba osang ka The Assam Tribune ajanga metetdaktsü.
India nungi telungpurtemi par lushi nungi India anema mapa meinyakdaktsütsü aser general elections tembangba sülen northeast telungpurtem anema mapa inyaktsü ta senden nung Myanmar Army Chief-i nangzük, ta sorkar ketdangsertemisa ashi.
Parnokisa ashiba agi, Myanmar-i parnok inyaksangshi melenshinür aser iba jagi Myanmar nung telungpur telok 8 den ‘national ceasefire agreement’ agidang Myanmar sorkari India nungi NSA aser JIC den China, Japan, Bhutan, United Nations aser European Union nungi teshimtet nübotem jaok.
NSCN (K)-i India anema mapa meinyaktsü ta tenangzükba magitetba ajanga parnok ‘national ceasefire agreement’ nung medendaktsü. Iba tenangzüktep nung madenba telok ajakji ozüngi memelaba telok ta züngshitsü aser yimten telok kar danga item telok den tesentaktep aliba putetra, item yimten teloktemjia ozüngi memelaba telok ya züngshitsü, ta Myanmar sorkari metetdaktsü.
Prime Minister Narendra Modi-i India den kidangsüa aliba linüktem den tesentaktep tajungba akümtsü atema jangrar aser pai ashiba agi tesentaktep ayubaji o nung dang masü saka senotsü aser tanga teyaritem agüja ayutsüla ta shiogo. Iba nungji ajemdaker tanü-asüng ka Myanmar-i India den tesentaktep yanglushitsü meranger, ta sorkar ketdangsertemisa metetdaktsü.
Ano, Myanmar-i küm aika India denbo China denang tesentaktep tajungba yua liasü saka Myanmar kübok Northern Province tsütsü telungpur telok kari inyaksangshiba ajanga China den tesentaktep mejungi kümogo, ta parnokisa ashi.
Tawa tu Myanmar Army-i Northern Province tsütsü telungpurtem anema mapa inyak aser iba mapang bomb amshidang China nunger senso asem pokset. Iba tatalokba nung ajemdaker China-i Myanmar tsütsü sepaitem akangshitsü tenzük saka Myanmar Army-i ashiba agi parnoki asaa China nunger tepsetba masü anungji iba inyakyimji magizüker ta ashi.
Myanmar sorkarisa Northern Province nung telungpur telok kar China nungi teyari agia parnok den rarar ta temulung melemi bilemer, ta sorkar ketdangsertemi metetdaktsü.