Indo-Myanmar arrtsü nung security akangshir

Aizwal, July 4 (Agencies): Assam Rifles puri eastern Mizoram, Indo-Myanmar nung temesepba mozü aser prangbong injang shibelenba nokdangtsü asoshi security tali akangshiogo.
“Onoki India-Myanmar (510 km) nung amenoker aliba sepaitem nem osang agütsüogo. Ozüng alema amshiba temesepba mozü aser prangbong injang shibelenba osang angazükba sülen arrtsü nung tali kümdangshia inyakdar,” ta Assam Rifles ketdangser kati ashi.
Pai ashiba agi, osang tejangja ka angazükba sülen Assam Rifles sepaitemi Myanmar arrtsü nung aliba Mizoram yimtsüng Farkawn aser Vaphai na tsüngda nung AK-56 rifle pongu, injang inoker aliba magazine tem aser ano injang kar ta Deobarnü apu.
“Sepaitemi Tiau ayong anasa meita mena ataa liasü. Deobar anepdang telungpur ana Myanmar len nungi Tiau ajanga India-i aitsü merangya lia sepaitemi parnok jazükba sülen telungpurtemi prangbong injang bena aliba yangku ayong nung inoktsür Myanmar leni jena oadok,” ta ketdangserisa ashi.
Mizoram nung Assam Rifles sepaitem prangbong injang apuba rongnung iba yaa tongtibang ka lir. Item prangbong injangtem Manipur nung amenloker aliba telüngpurtem den melenteptsüba liasü.
Arunachal Pradesh (520 km), Manipur (398 km), Nagaland (215 km) aser Mizoram (510 km) state ajak meyokteper Myanmar den arrtsü km-1,643 lir. Item rongnung atsü matsüi aliba tesem km 16 lir.
Maneni Mizoram aser Bangladesh na arrtsü km 318 lir aser idakji Border Security Force (BSF) amenoka lir.
Nagaland aser northeast nung tanga state kari arrtsü nung atsü atsütsü asoshi nokdanger kechiyong iba ajanga linük anaprongla nung aliba tribal tem tesendaktep raksatsü, ta bilemer.