Indo-Myanmar arrtsülen NSCN-K pur 2 den kaketshir 2 kahset

Dimapur, July 16 (TYO): Bodhbar aonung Indo-Myanmar arrtsülen Meluri sub division kübok Avakhung nung security sepaitem den kahtepba mapang NSCN-K pur ana asü aser ka yiruogo, ta osang angazüker.
Iba tatalokba nung tasür angji, Phor yimer Captain, Puhachu aser ka Burma Naga nunger lir, ta angazüker.
Assam Rifles-i telungpurtem telok jagi school tanur tebur ana pur aoba sülen patrol party ka Phek district, Meluri-i aoba mapang telungpurtemi amakba ajanga sashia kahtep tenzük.
Parnok tsüngda Brihostibar anepdang tashi kahtep aser iba tesem nungji NSCN -K pur ana lahset aser yirua alisangji sepaitemi puogo. Iba tesem nungjagi AK-47 rifle densema rifle kar nguogo.
Tan ita tetenzüklen NSCN(K) puri Meluri subdivision kübok Avangkhu aser Pokhungri na yimtsüng nungi school tanur tebur ana pur ao, aser teburtemji telungpur telok nungji dendaktsütsü asoshi kangshia anir aoba südi ta security sepaitemi temulung melemi bilemer, ta osang angazüker.
“Kangshia shimoktsü asoshi inyakba mapaji Nagaland nüburtemi magizüktettsü ta NSCN(K) dang sangoktsüogo aser tesem nung tensa aser yimjung raksatsüsa telungpur teloktemi inyakba maparentem noktangtsü asoshi security sepaitemi mera ajak agitsü,” ta Assam Rifles sangdong ajangasa ashi.
Ano menor aruba osang ka ajanga ashiba agi, Meluri sub division kübok Phor yimtsüng nung Assam rifles-i injang yokba mapang nisung ana kahset aser ka yiruba ajanga tensa mejungi lir.
Sepaitemi kahsetba nisung anaji high school kaketshir tetsür ka aser tebur ka lir, aser yirua alilaji tantsür ka liasü.