Indo-Pak tesendaktep ajungtsü Modi agientsüla:Mani Aiyar

New Delhi, November 17 (Agencies): Congress lennir Mani Shankar Aiyar-i, India aser Pakistan na tsüngda ken o ya tang aliba Ato kilonser Narendra Modi pa menden nungi agien nung dang takok ngua tembanga jembitettsü, ta Pakistan television channel ka ajanga ashi.

“Mezüng Modi ageintsü nüngdaker, mesüra ken o tajunga küma mejembitettsü. Ibaji atema küm pezü atatsüsa akümtsü. Nüburtemi Modi ali nungang item ken o tejaklen oa jembitettsü amai bilemer, ajisüaka nibo ibaji aitsür,” ta Dunya TV den interview agiba mapang Aiyar-i ashi.

Pai iba o jembiba angashia, Minority Affairs Minister Najma Heptulla-i, “Narendra Modi ya nüburtemi shimtet, ta Mani Shankar Aiyar-i amatok alitsü südi. Pai jembiba o nung tatettsü lir aser onoki iba o aitsür,” ta ashi.

Pai iba o jembiba ajanga yimten nung mepetmesü adoktsü ana nung lir.

“Indo-Pak ken o takok ngua jembitsü asoshi Modi Ato Kilonser menden nungi agientsüla. Modi lenisüba nung Indo-Pak tsüngda tesentaktep tajungba akümtsü amai bilemertemji mapang entoka imlartem lir,” ta Aiyar-i ashiba video clip tatsü ka agi social media süngogo.

Facebook aser Twitter ajanga nüburtemi tesüiba mapang cabinet minister-i jembiba aija lemsatepogo.

Twitter amshirtemi Aiyar-i ozüng alema jembishinüogo ta twitter nung vote sütepogo.

Ano congress-ia, Aiyar-i jembibaji pa mulungka agi jembiba lir aser ibaji party tebilemba masü, ta ashi.

Congress lennir Jaiveer Shergill-i, “Mani Shankar Aiyar nem party indang otongdar ama jembitsü temelaba agüja mali,” ta ashiba osang kar ajanga metetdaktsü.