Indo-Pak tzü tebilemtsü bentettsü CoA tentettsüla: Nawaz Sharif

Islamabad, January 26 (Agencies) : Brihostibarnü Pakistan Ato Kilonser Nawaz Sharif-i, World Bank dang India aser Pakistan na tsüngda tzü tebilemtsü bentettsü atema Court of Arbitration (CoA) ka tenteter nenoki tongti shilem agiang, ta temepishiba ka agütsüogo.
Bank Chief Executive Officer, Kristalina Georgieva-i Sharif den arua ajurutepdang Sharif-i la nem iba temepishiba agütsü, ta Radio Pakistan osang ajanga metetdaktsü.
Tzü tebilemtsü den ano tanga nüngdak lemteptsü asoshi Georgieva den ano nisung kar dena Brihostibarnü Pakistan tonga arua, ta kasa osang ajanga metetdaktsü.
World Bank-i Indus Water Treaty (IWT) tebilemtsüa 1960 küm bentettsü aser ibaji ajanga ayong aika Pakistan aser India na tsüngda telemsatsü tim lemsatet. Ibaji tang masü saka parnok IWT atema kibur amai kümer linük ana tsüngda iba dak sendaka nung mangatettep ajak parnoki angadanger olepdang agütsür.
Tawa India nungeri inyaka aliba hydro project tulu ana Pakistan nungeri ashishia liasü.
Yaküm October ita Pakistani World Bank dang item project tulu ana ya nokdangtsü asoshi Court of Arbitration mendenbuba ka shimtsü ajurutepa asüngdangogo.
Sharif-i, kü sorkar-i Indus tsütsü dam tulu aser Balochistan nung dam tilatem yanglua nüburtemi nüngdakba energy agitsü nükjidong liasü, ta ashi.
Pai, Diamer-Bhasha Dam project yabo linük asoshi kanga tongtiba kechiba süra iba yagi linük nung nüngdakba energy kanga junga melenshitsü, electric sen dalang akümtsü aser tzü bendena ayuba nung yaritsü, ta shisem.
Ato Kilonseri, Pakistan aser World Bank na tsüngda 1952 küm nungi tesendaktep kanga junga lir, ta ashi.
Pai, Tarbela-IV, Tarbela-V aser Dasu Hydropower Project tem nunga Pakistan-i nüngdakba ama World Bank-i kanga yariogo, ta ashi.
Ato Kilonseri Pakistan rongsenkettsüng ajungkettsü asoshi kangasa junga inyaktetogo aser World Bank-ia iba dak sendakba nung nungita yaritsü, ta Georgieva-i Sharif tenüngsanga ashiba mapang metetdaktsü.
La ya Pakistan nungi India-i orr IWT aser ano Pakistan den tzü atema tebilemtsü alibatem atema olemtep kar akatsü sentong lir, ta Pakistan ketdangsertemi metetdaktsü.