Indo-US tesentaktep akangshir

Taoba mapang India aser United states tsüngda onük kar nung mangatettep adoker tekong merangtepa aruba sülen, Deobarnü Houston nung ayonga agiba ‘Howdy Modi’ sentong nung US President Donald Trump aser Prime Minister Narendra Modi na külemi sabang ka nung shilem agiba ajanga linük ana tesentaktep tali akangshitsü imlar. Iba sentong nung Modi-i Pakistan anema jembiba dang masü saka Donald Trump tanaben US tir inyaktsü pusema jembiogo. 2014 küm nungi Prime Minister Narendra Modi indang foreign policy aser BJP indang ideology nung linük balala nung India nunger ajurutepa sendakteptsü meranga inyaka arur. PM Modi-i linük ka semdang shia, idakji aliba India sensotem den ajurutepa sensaksemer aser kasaji pai ‘Howdy Modi’ sentong nunga inyakogo. Iba mapang pai Trump tanaben shimtsü indang tayongzükba ka agütsü aser shibai metet Modi-ibo Indo-US tesentaktep tali akangshinüba agi Trump tanaben US Tir inyakdaktsütsü tayongzükba agütsü asütsü akok, saka US nung Indian-American nungertemi Trump nem vote agütsütsü asü masü’ar, ibajibo mapangi dang bentsür arutsü. Indo-US tesentaktep ya taoba Prime Minister Manmohan Singh mapang, 2005 küm civil nuclear agreement agiba ajanga kanga takangba küma liasü. Iba sülen lia arudang, tanü India dangi defence equipment supplier tulutibaji Russia sülenbo US tanabuba jenjang nung kümogo. Taoba küm ishika tsüngda India aser US tsüngda shishilembabaren tsütsü jenjang tajungba aküm aser American multinational company aikati India nung dokantem lapok shishilembar aser iba ajanga mapa lakh aika adokdaktsüogo. Tanü alima nung democracy tejentiba linük aser democracy tulutiba linük tsüngda tesentaktep akangshiba ajanga, US-i joko Pakistan den India kasa mezüngshir. Iba ya India-i küm aika US den jungtepa arutsü merangba ajanga tongtetogo. Tangbo US tongti ketdangser kati New Delhi semdangi arudang Islamabad nung manenzüker. Ajisüaka, tanü India aser US sorkartem asoshi tayongzükba kar ajurua lir aser item rongnung shishilembaba tsütsü onük kar lir. India-i taa talila agiba atema Trump-i luja jembiogo aser tawa tu US-i India nungi tariff-free exports maparen anena atatsü lemtet. Iba ajanga India-ia meyiper US nungi tariff-free exports inyakyim sota lir. Anungji, India-i US den tesentaktep tajung yunür süra, atsüanem kaa inyaksangshitsüba kanga tongtipang lir. India-i Russia den mitkar tsütsü tesentaktep ayuba aser Iran nungi totzü alizükba onüktem ajanga US-i India dak temulung melemteter. Deobarnü Modi aser Trump na medemer tajung ama, kati ka sangtepa jembiogo saka yamaji süaka, India-i US nem temulung lemdaktsütsü atema teinyaktsü aika lir aser itemji inyak nung dang US ji India atema akang tembar tajung ka asütsü. Iba ama mapangji ajurura, alimai India tali akhümtsübutsü.