Indonesia airforce tayimtsü tsükokdang nisung 13 asü

Indonesia sepaitemi December 18, 2016 nü tsükokba tayimtsü reprangtepba noksa nung angur.

Jakarta, December 18 (Agencies) : Deobarnü Indonesia anüdoklen parnok meyong military tayimtsü ka tsükokdang nisung 13 asü, ta ketdangsertemi metetdaktsü.
Tanü tsükokba Hercules C-130 tayimtsü ya Papua province kübok Timika yimti nung crew 12 den passenger ka anir apuso, ajisüaka iba tayimtsü anentsü mapang tatsüka tang lia kecha maliba tenem ka nung tsükogo, ta ketdangsertemi ashi.
“Ali nungi iba tayimtsü atema osüng ola asüsangi anepdang 6:08 (par mapang) tashi tayimtsü ngua liasü saka 6:09 nungi osang magitetti aküm,” ta air force chief Agus Supriatna-i AFP dang ashi.
Iba tayimtsü ya anepdang 6:13 nung alua anentsüba liasü. Tayimtsü nung pilot 3, technician 8, navigator ka aser military officer ka den chiyungtsü aser cement bena liasü, ta Supriatna-i ashi.
Ashiba agi iba tesem nungji tsüngsang mopung memeteti arur aser iba tayimtsüji metsükok tasüngda mepet telungi ili adokli ta asü, ta pai shisem.
Rescuer temi tayimtsüji tsükokli angu aser tasümang ajak ngutetogo, ta air force osang ajanga metetdaktsü.
Supriatna-i, tayimtsü tsükokba tesem nung bushisüngdangtsü atema telok ka yokdar, ta ashi.
November ita nunga Borneo nung military helicopter ka tsükokdang nisung asem asü aser iba jakdang July ita nung Central Java nung military chopper ka tsükokdanga nisung asem asü.
March ita Sulawesi, central Indonesia nung military helicopter sa ka tsükokdang nisung 12 tashi asü.
Ajak dang lendong tamajungtibaji 2015, June ita air force indang Hercules C-130 tayimtsü Medan yimti nung nisung aliba tesem ka nung tsükokdang nisung 142 tashi asüba aser teraksa tulu adokdaktsüba liasü.