Indonesia & Bangladesh FM-i Rohingya refugee jenokdak semdang

Dhaka, December 20 (Agencies): Tang Bangladesh semdanga alir Indonesia Foreign Minister, Retno Marsudi aser Bangladesh Foreign Minister, A.H. Mahmood Ali nati Bangladesh kübok Ukhiya nung tentetba Kutupalong refugee jenokdak tanü, Mongolbar nü semdangogo.
Marsudi o Ali nati taoba hopta ishika tejaklen nungi tenzüka, Myanmar kübok Rakhine state nung lendong kanga sashia atalokdaktsütsü tenzükshiba sülen pei taküm kümzüktsü nükjidong nung iba state toktsürtem den tsüngdong ajurutepa sensaksema liasü.
Tawa Rakhine state nung lendong kanga sashia ataloktsütsü tenzükshiba sülen tanü tashi nung nisung 86 tashi tepsetba aser nisung 30,000 shi pei talidak toktsür jenokdak balala nung jenoka alitsü tenzükba osang bushiteta lir.
Tenati tanü refugee nisungtem semdangba jakdang Myanmar kübok Yangon nung yashi, Hombar nü amenba ASEAN senden nung Myanmar State Counsellor, Aung San Suu Kyi-i Rakhine state tensa den sentakba osangtsüsang metetdakja liasü.
Taoba mapang, 2013 küm nungi tenzüka, Rakhine nung alir nütsüng yongsük ajema alir Muslim Rohingya nisungtemi rishikangshi tia ajuruba anentsütsü atema temulungsüa meinyakba keno nung ajemdaker alimai Suu Kyi aser lai aniba Myanmar sorkar aitsütsü tenzüka lir.
Taküm, 2016 küm October ita nungi tenzüka, Rakhine nung tensa azüoktsü atema yokba Myanmar mitkartemia tetsür takümtem tashiyim agi raksatsüba aser Rohingya nunger aliba ki aser tekülem ki ajunga rongdoktsü densema, ozüng alema kanga sashia inyakba keno nung aibelenba osang bushiteta lir saka parnoki aibelena meinyak ta mitkartemi peisasa metena jembitsü tenzüka lir.
Marsudi o Ali na den külemi, Myanmar’er State Minister for Foreign Affairs, Shahriar Alam; Foreign Affairs Secretary, Shahidul Haque aser alima jenjang nung tentetba lokti tentet balala nungi lenirtemi Kutupalong refugee jenokdak semdangba osang jangjaogo.
Marsudi-i tan Bangladesh semdangdang par Ato Kilonser, Sheikh Hasina dena ajurutepa senden amentsü sentong renema lir.