Indonesia-i aibelener nem tasüba temerenshi agütsütsü lemtetshir

Jakarta, April 07 (Agencies): Indonesia sorkari ozüng alema mozü mora shibelena aibelenbertem nem tasüba temerenshitsü agütsütsü lemtetshiba osang ka Indonesia Attorney General, H.M. Prasetyo-i tanü, Brehostibar nü metetdaktsüogo.

Indonesia-i bendanger timba densema, ozüng alema mozü mora shibelener ishika tepseta merenshiba sülen alimai kasaji aitsütsü tenzükba yong aibelener nem tasüba temerenshi agütsütsü maparenji yaküm küm tatemlen nungi tenzüka mapang tatsüka atema agiena liasü.

Ajisüaka, ozüng alema mozü mora shibelena maparen kangasa sashia inyakba yong kasaji nokdangtsü nükjidong nung Indonesia-i aibelener nem tasüba temerenshi agütsütsü mapatongji tanaben inyaktsü asoshi tan lemtetshir lir.

Alima linük sorkar lenirtem aser alima jenjang nung nübur temeten asoshi tentetba tentettem ashi mangai Indonesia-i Australia, Brazil, Netherlands aser Nigeria sensotem densema, ozüng alema mozü mora shibelener nisung 14 tashi yaküm tepseta merenshiba osang jangjaogo.