Indonesia I-Day jilia nüburtem tzüküm nung jaja

Jakarta, August 16 (Agencies) : Mongulbarnü Bali asetkong nung aliba Kuta tzüküm, 71buba Indonesia nüjiso anguba anogomong jilia amongertem agi sünga liasü, ta osangbenertemi ashi.
Iba benjungmong sentong nung sorkar aser military ketdangsertem den kaketshirtem dena nisung 2,000 dak tema aden, ta sentong ayonger Saya Indonesia-i ashiba Efe osang ajanga metetdaktsü.
Raliwalirtem tzüsem nung surf süa among aser nübur noklang aika tzüküm nung march asü. March asürtemi au nung alenloker aliba Indonesia wako ka ka amer sentong nung shilem agi.
March asüba temer külen parnok tarensena nokdaka aliba mapang Bali military chief-i linük dak sentakba o tatsüka jembi aser iba sülen telok ajak külemi linük naklu ken aten.
Iba benjongmong sentong temer külen baltin tulu ana nung yua aliba turtle techanu 100 tzüyim nung chioktsü, ta o jembir rongnung kati ashi.
Ano Bali nungsa Independence day sentong kar Bodhbarnüa agitsü.
Indonesia nunger August 17, 1945 nü Netherlands yimsüsüba nungi nüjiso angu.