Indonesia: Kiralongrar ta temulung melemi bilemba nisung trok khaset

Jakarta, April 9 (Agencies) : East Java, Indonesia nung police aser kiralongrartem khatepdang tajemba agi kiralongrar ta mulung melemi bilemba nisung trok khaset, ta Deobarnü ketdangsertemi ashi.
Linük Police otongdar, Boy Rafli Amar-i, tang police temi khasetba kiralongrartemji Jamaah Ansharut Daulah (JAD) telungpur züngsemtem lir aser parnoki Honibarnü traffic police ana dak akhaba sülen Tuban nung aliba tsük lu ka nung longbanger akah, ta osangbenertemi ashi.
Amar-i, kiralongrartemi police ana dak gari ka nungi injang akhaba sülen iba raraji Honibar anepdang 10:00 ako nungi tenzük, ta ashi.
Police-i arishia akhaba mapang parnok gari nungi alur tsük lu sema ajen aser idangji mobile brigade aser kiralongrar nokdangertemi parnok khaset.
Police-i item kiralongrartem indang gari, 9mm injang aika den prangpong trok, cell phone pezü, osang agitepba radio ka, kotari aser kiralongraba mapang amshiba oset kar pua yua lir.
“Kiralongrar nokdangba police teloki Hokolbarnü JAD lenir Zainal Anshori apuba mang ayangtsü asoshi kiralongrartemi par leniri tuyuba ama police dak injang agi akha,” ta Amar-i ashi.
Parnok tasür rongnung nisung pezübo jangjaogo. Parnokji Adi Handoko, Satria Aditama, Yudhistira Rostiprayogi, aser Endar Prasetyo nungertem lir.
JAD ya Indonesia nung 2015 küm tentetba extremist telok kübok aliba telok ka lir. Ashiba agi iba telok ya Islamic State kiralongrartem den tesendaktep lir.
Indonesia ya Muslim amanger timtiba aliba linük ka lir aser tawa ang IS kiralongrartemi lendong agütsüba ajanga tebilemtsü nung lir.
Ketdangsertemi ashiba agi Indonesia nunger nisung 400 tashi Syria nung aliba IS telok nung adentsü asoshi ogo.