Indonesia linük-i India nungi satellite kahkettsütsü

Jakarta, September 03 (Agencies): Jakarta, Indonesia nung yangluba satellite ka September 27 nü India nungi kahkettsütsü sentong renemogo, ta Brihostibar nü media ajanga ashi.
Indonesia linüki iba satellite nem LAPAN A2/Orari ta tenüng agütsüogo. LAPAN A1/Tubsat, India nungi 2007 küm kahkettsüba sülen LAPAN A2/Orari rangben ya 2012 küm National Institute of Aeronautics & Space (LAPAN)-isa Indonesia nung yangluba lir, ta Jakarta Post ajanga metetdaktsüogo.
“LAPAN A2/Orari satellite ya ni tanü official süa yoker,” ta Brihostibar nü Tir Joko Widodo-i ashi.
Iba satellite ya Hokolbar nü India-i yoktsü aser Sriharikota, Andhra Pradesh nung aliba Satish Dhawan Space Centre nungi kahkettsütsü.
LAPAN A2/Orari yagi linük nung ali amshiyim, rong senzüba, tzü nung aliba rongsen aser ango apuba tem indang osang tejangja bendenba mapa inyaktsü.
Iba satellite nung pa sasa osang agütsüba system ka keta lir aser ibaji ajanga lendong arutsü aliba ajak karakara metetdaktsütsü.
LAPAN A2/Orari ya equator tsütsü alima lunga jajatsü aser second ka nung kilometre 7.5 jajaba ajanga kenü nung alima 14 ben tashi lungtettsü.