Indonesia nem sen billion 1 aputsütsü renema lir: Cameron

Britain Ato Kilonser, David Cameron (Abelen) aser Indonesia Tir, Joko Widodo nati Jakarta kübok Presidential Palace kilung nung teka amtepba ajuruba noksa nung angur. (Jakarta, July 27).

 Jakarta, July 27 (Agencies): Indonesia nung nungdakba ki o jen yanglutsü aser iba amala maparen nung yariteptsü nükjidong nung Britain-i par pound sen billion 1 tashi aputsütsü renemba olen ka Britain Ato Kilonser, David Cameron-i tanü Hombar nü metetdaktsüogo.

Cameron-i shishilembatsü lenmang lapoktsü aser Islamic kiralongrartemi bener arutsüba timtem külemi lungjemer agientsü nükjidong nung anogo 4 agia Southeast Asia semdangtsü tenzüka tanü Indonesia tonga aoba sülen iba olenji metetdaktsü.

Par sorkari Southeast Asia ajunga nung tulutiba economy, Indonesia nem nungdakba senotsü apuja yaritepba ajanga sen million 200 shi jenjang aketba shishilembatsü osettsüset Indonesia nungi Britian-i bener oa idakji yoktettsü imlaba olen ka Cameron-i tanü lemsatepa liasü.

Cameron-i tanü Indonesia Tir, Joko Widodo den ajurutepa par linük ana tsüngda shishilembatsü tezüngzüktep ayutsü den sentakba onüka benoka jembiba osang jangjaogo.

“Britain aser Indonesia nati külemi lungjemer insurance, infrastructure, Internet services aser iba amala mapatong balala takok tulu inyaktettsü,” ta pai ashi.

Tan Southeast Asia semdanga senzüdang Cameron-i sen million 750 dak tema jenjang aketba shishilembatsü tezüngzüktep agitsü sentong renema lir.

“Ozü Britain-i Islamic State (IS) densema Islamist kiralongrartem meshimeshia samatsütsü alizüng yua lir,” ta shia, par linüka anti külemi lungjemer Islamist kiralongrartem den tongpang raratsü onüka Cameron-i tanü Widodo den benoka liasü.

Cameron-i Malaysia semdanga par Ato Kilonser, Najib Razak dena ajurutepa senden amendang Islamist kiralongrar den sentakba onük benoktsü sentong renemba osanga anagzükogo.

Alima ajunga nung Islam tamangba benshir timba alidak, Indonesia nungi nisung 500 shi aser Malaysia nungi nisung 200 shi Iraq aser Syria na nung lendong kanga sashia atalokdaktsüba kiralongrar telok tetsüti, IS nung züngsemba osang bushiteta lir.