Indonesia nung TR Zeliang nem ‘Lifetime Achievement in Transformation’ sempet agütsü

April 23, 2016 nü Indonesia kübok Pullman Bali Legian Nirwana Hotel, Bali nung Nagaland Chief Minister, TR Zeliang-i akhümket award,  ‘Lifetime Achievement in Transformation’ agizükba noksa nung angur.

Dimapur, April 23 (TYO): Indonesia kübok Bali nung 6 buba Global Leadership Awards 2016 sentong ayongzüka agir aser Honibarnü Nagaland Chief Minister, TR Zeliang-i iba sentong nung linük balala nungi shishilembar mongintem den ajurutep, ta Media Cell, Chief Minister’s Office sangdong ka nung metetdaktsü.
India-i Northeast state tem ajanga South Asian linüktem den tesentaktep tajung yanglua shishilembatsü aser rongsenren dak sendakba mapa inyaktsü nükla nung Act East policy den liromedema TR Zeliang-i tanü mera tasen ka agiogo, ta sangdong nungsa shia lir.
Honibar nikongtsütsü Pullman Bali Legian Nirwana Hotel nung Nagaland Chief Minister, TR Zeliang nem ‘Lifetime Achievement in Transformation Award’ agütsü aser iba sentong nung alima tesem balala nungi mongin nisungtem aika aden.
South Asia nung Global Leadership Awards ya kanga tongtibang sentong ka lir aser iba nung yimjung atema mapa inyakertem, shishilembartem, sorkar nungi, sensaker yarirtem, media, celebrity aser social sectors nungi mongin nisungtem adenshia shilem agir.
Iba sentong ya Leaders International ta ser telok ka ajanga ayongzüker aser US nungi NGO- American Leadership Development Association-ia teyari agütsür.
Alima tesem balala nungi mongin nisungtem züngsemba luden ka ajanga Nagaland Chief Minister, TR Zeliang nem iba sempet agütsütsü tenüng jateta shim, ta Media Cell sangdong nung shia lir.
Tesüiba küm asem tsüngda pei wadang nung mapa inyakba aser lenisüba nung ajemdaker telemsa balala nung nisungtem shima sempet agütsür ta Iba sentong ayongertemi ashi.
Tanep Nagaland Chief Minister-i Malaysia nung Prince of Selangor, Sultan Sulaiman den ajurutep aser iba mapang pai Naga nunger waistcoat aser sü tabentsü ka sempet agütsü, ta Media Cell sangdong nungsa metetdaktsü.
Sultan Sulaiman-i TR Zeliang den sensaksemdang, Northeast India kübok aliba state tem nungi arurtem teimbaka Southeast Asian nunger den jaksübangsü temesüktep alir aser sobaliba den yimyatsüya nunga kanga mesüktepa lir, ta ashi.
TR Zeliang-isa Institute of Darul Ridzwan, Economic & Political Research, State of Perak (Malaysia) nung CEO, Dr Mazlan den ajurutepa senden ka amen aser iba mapang India-i Act East Policy dak rangloker mapa inyakba osang metetdaktsü. Nagaland chief minister-isa Abu Dhabi atema Economic Advisor, Princess Badaria den ajurutep.