Indonesia nung tsüokba tayimtsü nung $470,000 bena liasü

Jayapura, August 17 (Agencies) : Indonesia nung nisung 54 amenba tayimtsü ka tenemlen tsüokba bushitepertemi Hombarnü lendong atalokba tesemi aotsü apusogo.

Iba tayimtsü ya Indonesia nunger Trigana Air indang lir aser Deobarnü Jayapura nungi apusoa aoba sülen air traffic control den tongtepratep sama.

ATR 42-300 twin-turboprop tayimtsü nung passengers 49 aser crew züngsem pungu mener Oksibil-i ao.

Iba tayimtsü nung 6.5 billion rupiah ($470,000) bena liasü. Taseptsü pezü nung abenba senji sorkar meyong lir aser postal ketdangsertemi sensaker kibongtem nem agütsütsü atema abenba liasü, ta Jayapura post office nung ketdangser Haryono-i ashi.

Tayimtsüji ali nung anenzüktsü minute 10 dang lia tsüok. Tayimtsü anendak alua anenzüktsü atema asüngdangba sülen tayimtsü den tongtepratep sama.

Iba tesem nung lir yimdaklirtemi tayimtsüji Oksibil nungi tatsüka pilar tenemlen tsüokba angu ta ashiba sülen Hombarnü search plane kati iba tesem nung tayimtsü teraksa nguogo ta transport ministry-i metetdaktsü.

“Tanep yakta tayimtsü kati Oksibil anasa tayimtsü teraksa nguogo saka onoki ibaji kanga junga jangjashitsü” ta Indonesia transport ministry otongdar, J A Barata-i ashi.

Search & rescue agency-i tesem jagi tanga tayimtsü ka jangshitsü atema yokogo aser ano tetsüng agi iba tesemi search & rescue telok ka yokogo, ta Search & rescue agency ketdangser Bambang Soelistyo-ia metetdaktsü.

Taküm Indonesia nung tayimtsü lendong tulu ana tashi atalokogo aser iba nung AirAsia tayimtsü tsüokba dena lir.

Tanabuba tatalokbaji June ita Medan yimti nung Indonesian military plane tsüokba liasü. Iba lendong nung nisung 142 asü.