Indonesia police-i kiralongrar ka kaset; 2 apu

Jakarta, January 15 (Agencies): Islamic State (IS) kiralongrar telok kati Indonesia yimtiba, Jakarta nung lendong tesashi ka yashi, Brehostibar nü atalokdaktsüba sülen Indonesia police-i tanü, Hokolbar nü kiralongrar ta temulung melemi bilemba nisung 1 injang agi kasetba aser nisung 2 apuba osang jangjaogo.

Police aser mitkartemi kiralongrar ta temulung melemi bilemba nisungtem mita aodang nisung 1-ji kaset aser nisung 2-ji tanü apu.

IS kiralongrartemi yashi Jakarta kübok tentetba tongti shishilembadak atalokdaktsüba lendong nung amaker 5 densema, ajak agi nisung 7 tashi asüba aser nisung 20 shi yiruba osang jangjaogo.

Yashi atalokba lendong ya alima ajunga nung Muslim nunger nisung timba aliba linük, Indonesia nung kiralongrartemi tan mezüngsüa telok tenteta lendong tesashi atalokdaktsür lir.

Yashi lendong atalokba sülen Jakarta nung tentetba embassy ishika shibangba den külemi, police aser mitkartemi tanü  kanga dang kümdangshia par duty inyakba osanga jangjaogo.

Ano külen, Jakarta nung lendong tesashi atalokdaktsüba atema kiralongrartem aitsüba olen ka United Nations Security Council (UNSC)-ia metetdaktsüogo.

 “Tan lendong nung nisung asüba aser yiruba atema sasaba olen ka Indonesia ajunga den lemsateper,” ta shia, Indonesia police aser mitkartemi kiralongrartem tekaraba mapang nung songtemba atema parnok tenüngsang agütsüba olen ka UNSC-i metetdaktsü.

Indonesia den külemi, Cameroon, Turkey aser Pakistan nunger densema, al-Qaeda aser IS telok na densemba kiralongrartemi alima tesem ajunga nung lendong kanga sashia atalokdaktsüba atema tebilemtsü akaba olen ka UNSC-isa metetdaktsüogo.

UNSC-isa ashiba agi, kiralongrartem den külemi, parnok nem senotsü aser nungdakba teyari agüja yarirtema pua parnok nem ozüngi melaba ama tapet temerenshi agütsütsü langa lir.