Indonesia: Rong lendong nung migrant nisung 18 shi asü

Nongsa, November 02 (Agencies): Indonesia kübok Batam asetkong bushia aoba rong ka tzüyim nung mekübokba sülen rongi anir alir Indonesia nunger migrant mapa inyaker nisung 18 tashi asüba osang ka Indonesia police-i tanü, Bodbar nü metetdaktsüogo.
“Tan lendong ajuruba rongi ajak agi Malaysia nung mapa inyaker Indonesia nunger nisung 93 tashi anir Malaysia anülulentip tsütsü, Johor state toktsür Batam asetkong bushia aodang tzüyim nung meküboka lendong atalokba osang jangjaogo,” ta Indonesia’er national disaster mitigation agency-i osang jangjashitsü.
“Mupong aser tzüsem kanga sashia akümba sülen rongi tzüyim nung süngoka aliba lung dak tsükshia, rongji tzüyim nung meküboka lendong ajuruba osang angazükogo,” ta par tenteti shisem.
“Tan lendong nung asür nisung 18 rong nung kinü tanur ka densemba osang angazükogo aser rescue ketdangsertemi nisung 39 tashi taküm kümzüka anitetba osang jangjaogo,” ta iba region nung police lenisang, Sam Budigusdian-ia metetdaktsü.
Indonesia nunger aikati anogoshia tzüyim ajangdanga Malaysia bushia ao idakji mapa inyaka, peipok mesür.
Tzüyim agi lungbangba asetkong 17,000 shi densemba Indonesia linük nung tan amala rong lendong mapang shia ajuruba osanga bushiteta lir.