Indonesia Super Series: Saina Nehwal 2 buba round-i iogo

Jakarta, May 31 (Agencies): India’er tetsür badminton asayar, Saina Nehwal-i takok ngua, tang tasayadak Indonesia Super Series Premier badminton asayamong tetsür singles shilem 2 buba round asayatsü jenjang tanü, Mongolbar nü nguogo.
Taoba mapang champion akümtsü jenjang 3 ben tashi ajangzükla, Saina-i tanü ghonda 1 ser minute 3 shi nung points 21-11, 19-21, 21-15 agi tetsür World No. 23, ChineseTaipei tsür, Pai Yu Po tsükdaktsü.
Tetsür World No. 8, Saina-i Indonesia tsür, Fitriani Fitriani den par 2 buba round asayatsü lemzükogo.
Tan asayamong nung 8 buba jenjang abenla, Saina-i mezüngbuba set nung points 14-11 ngua temaba jenjang nung asayaba sülen maneni points 7 tashi atonga ajangzüka iba set-ji kokadok.
Tanabuba set nunga Saina-i points 10-5 agi temaba jenjang ngua asayatsü tenzük saka Pai-i points 7 tashi atonga anguba ajanga lai points 12-10 agi temaba jenjang ngua asayatsü tenzük aser lai maneni points 21-19 ngua, 2 tanabuba set-ji kokadok.
Takoker shimtsü set nung Saina-i points 11-5 agi Pai den temaba jenjang ngua asayatsü tenzük saka Pai-i kanga junga asayaba ajanga lai Saina menepa tenaprong points 13-13 aküm.
Ajisüaka, Saina-i points 5 tashi atonga ngua kanga junga asayaba yong lai points 18-13 agi 3 buba set-ji koka, tanü takok angu.
Saina-i taoba mapang, 2009, 2010 aser 2012 nung Indonesia Open takok marok agizüka lir.
Ano külen, India’er mixed doubles asayar, Manu Attri aser Ashwini Ponnappa nati minute 30 shi nung points 14-21, 25-27 ngua, Singapore asayar, Yong Kai Terry Hee aser Wei Han Tan na nem 2 buba round asaya kokdakja tanü tamakok ajurua liasü.