Indonesia tayimtsü tsüokba tesem nungi tasümangtem belentsü tenzükogo

Jayapura, August 19 (Agencies) : Deobarnü Indonesia nung nisung 54 amenba tayimtsü ka tsüokba sülen bushitepa arur Bodbar nungi tasümangtem bener aotsü tenzükogo.

Tanü Papua province nung Trigana Air tayimtsü ka tsüokba tesem nungi yimdaklirtem aser ketdangsertemi tasümang 17 tashi arem-min adena bener aru.

Tasümangtemji Oksibil tesem tonga bener aru aser idak nungjagi Papua yimtiba Jayapura-i mang pezü tayimtsü ajanga bener ao aser tanünga 13 ji mozü kidang yua lir, ta transport ministry otongdar, J A Barata-i ashi.

Mezüngbo ketdangsertemi tasümangtemji helicopter ajanga bener aotsü sentong yanglu saka tsüngsang-mopung majungba agi ibaji meinyaktet.

“Tsüngsang majungba ajanga onoki helicopter mamshiteter, aji agi ali nungang mangtemji bener aotsüsa akümer” ta sepai ketdangser Pudji Teguh Rahardjo-ia ashi.

Iba tayimtsü tsüokba tesem tonga aotsü atema anogo ana agi. Iba tesem ya Oksibil nungi kilometer 19 shi pila lir aser tsüngsang majungba den tenemtem aliba tesem asüba agi mapang agitsüsa aküm.

Trigana Air indang tayimtsüji kanga mejungi raksar liasü aser iba tesem nungjisa nisung tasümang ajak liasü.

Bushirtemisa black box flight data recorder aser sen 6.5 billion rupiah (USD 470,000) nungi kar ngutetogo. Senji sensaker kibongtem nem lema agütsütsü atema abenba liasü aser sen karbo mi agi kanga mejungi rongsar liasü.

France nunger BEA agency nungi bushisüngdanger asem, Europe nung tayimtsü yanglur ATR nungi technical advisors 4 iba tatalokba bushisüngdangtsü atema Indonesia tonga aruogo.

Iba tayimtsü ya Jayapura nungi Oksibil-i minute 45 nung tonga aotsü atema apuso saka ali nung anenzüktsü minute 10 shi lia tongtepratep melii aküm. Tsüngsang majungba ajanga tayimtsüji tsüok asütsü ta Trigana Air ajanga metetdaktsü.

Trigana Air ya Indonesia nung airline ka lir aser tesüiba mapangtem nunga lendong aika atlokogo. Iba company indang tayimtsütem European Union airspace nung mesenzütsü tenokdangba agüja lir.