Indonesia Tir, Widodo-i 12 buba Islamic World Forum lapoktsüogo

Jakarta, August 02 (Agencies): Indonesia Tir, Joko Widodo-i 12 buba World Islamic Economic Forum (WIEF) Jakarta yimtiba kübok Jakarta Convention Centre nung tanü, Mongolbar nü lapoktsüogo.
“Muslim kini alimar rongsenren jenjang tajungba kümdaktsütsü asoshi nungdakba maparen bendanga agüja inyaktsü ajungshir,” ta Widodo-i tanü mondang lapoktsüdang ayongzüka ashi.
“Muslim kini ketdang asüba Sharia rongsen ketsüngtsürena dollar sen million jenti jenjang tonga temaba jenjang nung lir. Ajisüaka, alima ajunga nung Muslim nisungtem rong nung mapa inyaktsü maongka monguteti alir jenti lir,” ta Widodo-i tan mongdang nung shilem agir lenirtem rong nung metetdaktsü.
“Alima ajunga nung Muslim nisungtem prokshia aliba ajanga Muslim kini alima jenjang nung ajuruba khuret ajunga koktetsüsa tashi lir,” ta pai ashi.
Paisa ashiba agi, pei kibok inyakyim aser ken o nung bendanger nem teka mamokdaktsüba ajanga Malaysia aser Indonesia na tensa tanü tashi junga lir.
“Osangtsüsang junga memetetba bendangertem nem teka amokdaktsüba ajanga Muslim kini timtem aser takoksa jenti ajuruba kuli jenti lir. Anungji, asenoki bendangeri asen kibok ken o nung teka amokba maparen anemer ta jangja janga metetdaktsütsüla. Ano, yimtenren tajangzük angutsü nükjidong nung bendanger teyari meshir Muslim linüktema aseni nokdangtsü nungdaker,” ta Widodo-i shisem.
Tan Brehostibar nü tashi amentsü ayongba mongdang nung Tajikistan Tir, Emomali Rahmon; Malaysia Ato Kilonser, Najib Razak; Guinea Tir, Alpha Conde; Sri Lanka Ato Kilonser, Ranil Wickemenshinghe aser Islamic Development Bank (IDB) Tir, Ahmad Mohamed Ali nunger densema, alima linük 69 nungi lenir 2,500 shi shilem agitsü tenzüka lir.
Taoba mapanga Kuala Lumpur, Islamabad, Kuwait, Malaysia, London aser Dubai nunger nung WIEF mongdang amenba osang jangjaogo.

You must be logged in to post a comment Login