Indonesia Tir, Widodo-i South China Sea semdang

Jakarta, June 23 (Agencies): Indonesia Tir, Joko Widodo-i China den mangatettep adokba South China Sea (SCS) kübok densemba Natuna Islands tonga tongpang nung amshitsü warship rong ka nung tanü, Brehostibar nü aoba osang jangaogo.

Natuna asektong par yimli kübok aiter ta China dang sayua, Widodo-i Natuna asetkong nung par cabinet yimsüsürtem den rong nung senden ka mena liasü.

Widodo-i par chief security minister, foreign minister aser mitkar lenisang anioksemer tan Natuna asetkong semdangba ya Natuna asetkong par meyong ta China dang kuli tejangja sayur lir.

“Asen linük meyong tzüyim tesemtem kümzüka ayutsü maparen taoba mapang nungi tesashiba inyaktsü nungdaka kümogo,” ta shia, par tzüyim mitkartemi mangatettep adokba SCS nung duty tali tesashiba inyaktsü tetuyuba ka Widodo-i par mitkar lenisang nem tanü senden nung agütsü.

Tanü senden nung Indonesia’er peisasa pei madak yimsü asütsü temeten aser par linük nung terenlok lidaktsütsü onüktema benokba osang ka Indonesia Cabinet Secretary, Pramono Anung-ia metetdakja liasü.

“Indonesia linüki SCS ken o nung China nem tanü sangoktsüba osang amabo osang tesashi taoba mapang mesangoktsüi lir. Tanü SCS semdangba ajanga ozü Tir, Widodo-i SCS ken o kanga reta züngshiba kuli sayur,” ta Chief Security Minister, Luhut Pandjaitan-ia ashi.

Ano külen, China-i Natuna asetkong par meyong ta mezüngshir saka SCS kübok densemba tzüyim tesem karbo par linük anaprongla indang arok meyong aliba osang ka China-ia tanü metetdaktsüogo.

“SCS mangatettep ken o bentettsü asoshi Indonesia-i lenji arutsü imlar. Ozü linük anati SCS den sentakba mangatettepbaren bentetta ozü linük anaprongla nem arok tajangzük bener arutsütsü aser ozü linük ana densemba region nung yimji yimjung lidaktsütsü alizüng yua lir,” ta China foreign ministry otongdar, Hua Chunying-i metetdaktsü.