Indonesia: Tzümetsüng lendong nung nisung 20 shi asü; jenti sama

Indonesia kübok West Java nung densemba Garut tesem nung tzümetsüng lendong atalokba sülen nübur ishika lendong atalokdak sentepa aliba noksa nung angur. (Garut, September 21)

Garut, September 21 (Agencies): Indonesia nung tzünglu kanga sashia aruba sülen ajungbena atalokba tzümetsüng lendong nung nisung 20 shi asüba den nisung jenti samar bushiba osang ka Indonesia sorkari tanü, Bodbar nü metetdaktsüogo.
Tan tzümetsüng lendongji Jakarta yimtiba nungi southeast tsütsüleni kilometer 200 shi pilar, Garut nung ajungbena atalokba osang jangjaogo.
“Garut nung tzü ajungbena metsübangtsü tenzükba sülen tzü nung arükseta asür tasümang 20 shi ngutet aser tang tashi nung tasümang 15 tashi jangjaogo. Kasa lendong nung samar nisungtem ozü search & rescue ketdangsertemi tanen makai bushitsü tenzüka lir,” ta Police disaster victims identification ketdangser, Endah Trisnawati-i osang jangjashitsü.
“Tan lendong nung nisung kwi shi sama iba osang tang tashi mejangjateti lir saka tan samar nisungtemji 20 shi alitsü akok to rescue ketdangsertemi metetdaktsüogo. Ano, tan lendong nung nisung aliba kia noklang aika raksaba osang bushiteta lir,” ta pai shisem.
Mei mapang tzünglu kanga sashia aruba ajanga Indonesia nung tan amala ajungbena atalokba tzümetsüng lendong den külemi, tenemlen anentsü lendonga mapang shia ataloka nüburtem nem timtem toushi jenti agütsüba osang bushiteta lir.