Indonesia volcano tesashiba akümer, Bali airport shibang

Mount Agung volcano nungi lava temokong yimzüka alua Karangasem, Bali, Indonesia nung aliba Yeh Sah ayong nung November 27, 2017 anogo yimokba noksa nung angur. Indonesia-i Mount Agung volcano atema tekümdangtsü ya temaba jenjang, level 4 nung yutsüogo.

Jakarta, November 27 (Agencies): Indonesia ajanga Mount Agung volcano ya temaba level 4-i ajungkettsüogo, ta disaster management osang ajanga Hombarnü ashi.
Deobarnü volcano kanga sashia adokba ajanga ketdangsertemi Bali asetkong nung aliba tayimtsü anendak tesem tuluba shibangtsü, ta national disaster management agency, Sutopo Purwo Nugroho nung odongtari osangbener dang ashi.
Iba volcano adokba ya phreatic stage nungi magmatic stage-i melena aonungbo mi tulu dang angur, aser ola tulu ya kilometre 12 nungia angashir, ta odongtari ashi.
Mount Agung nung volcano ya October 19 nung volcanologist temi tanabuba jenjangi ajema bener alutsü aser iba ya September 22 nung temaba jenjangi ajungkettsüba liasü.
Honibarnü iba volcano adokdang aut aser auyi ya anüngleni kilometre 4 tashi ato.
‘No-go zone’ nung aliba yimdaklirtem tekeraba nung yimtsüng toktsür aotsüla, ta Sutopo-i ashi.
Ngurah Rai international airport ya Hombarnep 07:00 (Deobarnü 2300 GMT) ako nungi shibangogo aser tayimtsü ketdangsertemi ghonda trok shia tensa asadangtsü, ta transport ministry nungi secretary of air transport, Pramintohadi Sukarno-i Hombarnü ashi.
Airport aser anasa aliba anüng ya volcano indang auyi prokshiba anasa lir, ta meteorology aser geophysics agency ajanga ashiba sülen airport tem ya shibang.
Bendanger nisung 200,000 dak tali-i Bali asetkong ya ita shia semdanger, ta national statistic bureau ajanga ashir.
Mount Agung nung volcano ya 1963 nung tesüsa adok aser iba mapang nisung 1,100 taküm sama. Indonesia nung active volcano 129 lir.