Indonesia’er raliwalir bus ka tsükok, 13 tsükset

Thailand kübok Chiang Mai anasa raliwalirtem anir senzüba bus gari ka lenkübokleni lua tsükokba sülen Thailand rescue ketdangsertemi lendong atalokdak mapa inyakba noksa nung angur. Tanü atalokba lendong nung ajak agi nisung 13 tsüksetba osang bushitetogo ta Thailand tourism ministry-i metetdaktsüogo. (Chiang Mai, December 20)

Bangkok, December 20 (Agencies): Raliwalirtem anir senzüba bus gari ka Thailand anüdoklen tsükokba ajanga Malaysia nunger raliwalir 12 aser Thailand nunger raliwalir anir senzür 1 densema ajak agi nisung 13 tashi tanü tsükseta asüba osang ka police-i metetdaktsüogo.
Thailand anüdoklentip tsütsülen, Chiang Mai yimti anasa, Doi Saket district nung tanü lendongji ajuruba osang Provincial police lenisang, Major General Montri Sambunyanon-i jangjashitsüogo.
“Nisung 23 tashi aniba raliwalirtem anir senzüba bus gari car gari ka dak atsükba sülen gariji lenmang tezüleni ao aser lenkübokleni lua tsükokba osang jangjaogo,” ta pai ashi.
“Thailand nunger gari anisang densema nisung 10 tashi tan lendong nung yiruba osang jangjaogo aser parnok ajunga tang Chiang Mai yimti nung tentetba mozükidang anepaludar,” ta pai shisem.
Paisa ashiba agi, car gari nung mena alir nisung anata tanü lendong nung yiruba osang jangjaogo.
Alima ajunga nung gari lenmang nung lendong timba ataloker linük rong nung Thailand-a densemba osang ka Thailand public health ministry-ia tanü metetdaktsüogo.
Gari senzütsü lenmang majungba den külemi, gari anishirtemi gari mashimashi anishiba aser temesepba yi jemer gari anishiba ajanga gari lenmang nung lendong kanga sashia ataloker ta ministry-i shisem.
Ano külen, Thailand semdanger raliwalirtem timba tarensen nung Malaysia nüburtem tanabuba jenjang nung lir.
Taoba November ita kisüng nung Malaysia nunger nisung 293,000 dak temai Thailand semdanga parnok Thailand semdanger raliwalir nisung noklang shilem nung shilem 11.5 akümba osang bushiteta lir ta Thailand tourism ministry-ia metetdaktsüogo.