Indonesia:Tayimtsü lendong nung asürtem temang shilem kar angu

December 04, 2016 : Batam, Indonesia nung tayimtsü tsükokdang asüba tasümangtem police ketdangsertemi sepa bener aoba noksa nung angur.

Jakarta (Indonesia) Dec. 4 (Agencies) : Deobarnü Indonesia nung rescue mapa inyakertemi police indang tayimtsü nung tsükoka asürtem indang temang tanüksa kar tzüyim nung angu. Iba tayimtsü nungji nisung 13 mener liasü aser tayimtsüji yashi tsükok asütsü amai bilemer.
Iba tayimtsü ya Sumatra anüolentip tsütsü anüdoklen aliba asetkong ka nungi apusoa Singapore anasa Batam asetkongi aoba mapang (Honibarnü) nungi osang kecha magitepteti aru.
Tayimtsü nung crew 5 aser passenger 8 mena liasü aser parnok ajak lendong nung sür asütsü akok, ta ketdangsertemi ashi.
M28 Skytruck tayimtsü ya tzü metre 24 tarok nung lua tsükoka alitsü akok, ta National Search & Rescue Agency tekolakba Henry Bambang Soelistyo-i ashi.
Pai, yimtaklirtemi tayimtsü nung aliba menden ka den cell phone ka aser police documents aliba yangkhu ka anguba tesem nungi tasürtem temang shilem kar ngua lir, ta osangbenertem den senden amendang metetdaktsü.
Iba kasa tesem nung totzü tokshia aliba dena angu, ta pai shisem.
Tzüyim nungi police uniform aser süoshi tanga-a kar ngutetba TV nunga sayuogo.
Batam nung police tekolakba Brig. Gen. Sambudi Gusdian-i, tayimtsüji Lingga district tezülen aliba tzüyim nung alua tsükokba sülen apok, ta tenük kuli angurtemi ashiba lepshia metetdaktsü
Singapore nungi tayimtsü ka den Indonesia navy, customs office aser maritime police dena iba tayimtsü tsükokba tzü nung square-kilometer 518 (200-square-mile) lunga bushisüngdangdar, ta Soelistyo-i ashi.
Parnok den külemi tzü telungi aiertema kar dena iba tayimtsü bushiba nung yaritepdar.
Indonesia nung Hopta ka tsüngdasa tan agi tayimtsü anabuba tsükoker. November 24, 2016 nü Indonesia army indang Bell 412 EP helicopter ka Borneo asetkong nung tsükokdang nisung asem asü aser ka tang tashi mangur.