Indore-Patna train lendong nung nisung 120 asü, 200 yiru

Deobarnü Pukhrayan, Kanpur nung train lendong atalokba sülen nisungtem bushitepba noksa nung angur. (Kanpur (Uttar Pradesh), November 20, 2016)

Pukhrayan, November 20 (Agencies): Deobar anepdang züngia Uttar Pradesh, Kanpur anasa Indore-Patna Express train coach terpezü tetsüng longteta tugua lendong tulu ataloka nisung 120 asü aser nisung 200 dak tema yiruogo.
Tanep 3:00 ako süili iba lendong atalokdang passengers timbaka mejanga orr liasü.
Iba lendong atalokba sülen army, NDRF aser state police-i railway sepaitem den yaritepa kümzükba maparen inyaka liasü.
Asürtem rongnung nisung 43 bo jangjaogo aser parnok rongnung Uttar Pradesh nungi nisung 20, Madhya Pradesh nungi 15, Bihar nungi trok aser Maharashtra o Gujarat na nungi kaka liasü.
IG (Kanpur range) Zaki Ahmad-i yirua alirtem rongnung nisung 76 mejungi yirua lir aser nisung 150 terara yiru, ta metetdaktsü.
Paisa, “Yirua alir nisung 150 dak tema anasa aliba mozükitem anir ao. Hospitals ajak dang tajungtiba nung yariteptsü asüngdangogo. Ambulances 30 dak tema amshidar,” ta ashi.
Lendong atalokba tesem nung osangbenertem den jembidang Minister of State for Railways, Manoj Sinha-i, iba lendong ya rail fracture ajanga atalok südi ta bilemer, ta metetdaktsü.
UP chief minister Akhilesh Yadav-i asür shia kibongtem nem sen lakh 5 aser mejungi yirur shia nem sen 50,000 aser tera yirur shia nem sen 25,000 agütsütsü sangdong. Ano Madhya Pradesh CM, Shivraj Singh Chouhan-i Kanpur nung aliba hospital tem semdangba sülen asür kibong shia nem sen lakh 2 aser yirua alir shia nem sen 50,000 agütsütsü sangdong.
Ato kilonser, Modi-ia asür kibong shia nem sen lakh 2 agütsütsü sangdong. Maneni Union Railway Minister, Suresh Prabhu-ia asür shia kibongtem nem senotsü teyari sen lakh 2 nungi lakh 3.5 tashi agütsütsü, ta sangdongogo.
Alima nung Indian Railways ya jenjang 4buba nung lir, kong anogoshia nisung million 20 dak tema train nung senzür, aser Indian Railways nung lendong shilem 50 bo train lenmang nungi tetsüng longteta tuguba ajanga ataloker.
Union Railway Minister, Suresh Prabhu-i küm ka piyong “zero accident mission” nükjidong yua aliba mapang ka nung iba lendong ya atalokogo.
Train lendong kuli Centre-i bushisüngdangtsü: PM Modi
Tanü Agra nung lokti senden ka nung jembidang Ato kilonser, Narendra Modi-i, “Centre-i Indore-Patna express train tsükokba kuli bushisüngdangtsü,” ta metetdaktsü.
“Mangyimba kibongtem atema ni sarasademtsür. Yirua alirtem tekaraba nung aneptsü atema ni sarasademtsür,” ta paisa metetdaktsü.
Minister of State for Railways, Manoj Sinha-ia, “Temaba jenjang nung bushisüngdangtsü atema tuyuogo aser onoki temerenshi tulu agütsütsü. Lendong atalokba kuliji engineers aser mongintemi bushisüngdangtsü, ajisüaka iba lendong ya rail fracture ajanga atalok südi ta bilemer,” ta metetdaktsü.