Indus Water Treaty sülen India-i MFN reprangshitsü

New Delhi, September 27 (Agencies): Tawa kiralongrartemi Uri amakba sülen India aser Pakistan na tesentaktep tamajungba akumba mapang ka nung India-i Pakistan den tezüngzüktep agia aliba- Indus Water Treaty reprangshiogo, iba sülen maneni India-i Pakistan nem Most Favoured Nation (MFN) jenjang agüja aliba reprangshitsü.

1996 küm Pakistan nem MFN maongka agüja liasü ajisüaka India-i iba ya reprangshitsü atema Ato kilonser Modi leniba nung Brihostibarnü senden ka amentsü ayongogo.

WTO’er General Agreement on Tariffs and Trade (GATT) kübok 1996 küm Pakistan nem MFN jenjang agüja liasü. Iba nung ya Indiaaser Pakistan napronglai sign süa lir, koba tetezü linük ana tsüngda aser tanüngba WTO züngsem linüktem den parnoki shishilembaba partner ama züngshia inyaktsüla.

Assocham-i ashiba agi, 2015-16 küm India-i shishilembaba US sen billion 641 nungi Pakistan den shishilembaba US sen billion 2.67 dang liasü.

Yashi Ato kilonser, Narendra Modi mendenbuba ser Indus Water Treaty reprangshiba senden ka mena liasü, aser iba senden nung Pakistan-i azüokba ayong asem tzüji India-i  aluyimba nung akokba tashi timtiba agitsü bangjemogo.

Iba senden nung National Security Advisor, Ajit Doval, Foreign Secretary S Jaishankar, Water Resources Secretary aser PMO office nung tongti ketdangsertem dena liasü.