Indus Waters Treaty dak sendakba nung India aser Pakistan sensak sem tenzükogo

Indian Indus Water Commissioner Pradeep Kumar Saxena (tabelen) aser par telok Pakistan nungi Syed Muhammad Mehar Ali Shah-i (tachichi) aniba Pakistan nungeri ketdangsertem den senden amen dang tangokba noksa nung angur.

Lahore, Luroi/August 29 (Agencies): Indus Waters Treaty dak sendakba nung India aser Pakistan na Rasemnü nungi senden tenzükogo. Ato Kilonser Imran Khan-i mapa belenzükba sülen iba ya mezüngbuba tongtibang senden asütsü.
Anogo ana ametsü aliba senden mezüngbuba National Engineering Services Pakistan nung kaogo.
Pakistan aser India water commissioner tem küm ana tsüngda khen ajurutepa ayong nung project balala asadangtsü nüngdaker, saka Pakistan nunger mapang shidak nung ajurutepa tesemtem semdangba nung timtem aika ajurua aruogo.
Indian Water Commission nung züngsemtem Commissioner P K Saxena-i anir aden aser kasa mapang nung Commissioner for Indus Waters, Syed Meher Ali Shah-i anir teshimtetba purtem Pakistan tenüng nung iba senden nung aden, ta osang ka ajanga metetdkatsü.
Iba senden nung linük anaprongla nungi report agütsütsü imlar. Senden tembangba sülen linük ana longjemer osang ka agütsütsü.
Sangtennü Shah aser additional commissioner Sheraz Jamil nati Saxena-i anir India nunger teshimtetba pur parnok teku agizüka liasü.
Pakistan-India Permanent Indus Commission na tatembangbuba senden New Delhi nung Metsüremi/March mena liasü kong telok anapronglai 1960 Indus Waters Treaty kübok tzü amshiba yimya aser tzü ayimba report agüja liasü.
India aser Pakistan na tsüngda iba treaty ya küm teku tashi jembishinüba sülen 1960 küm sign asü aser iba nung World Bank-ia sign asü.
Iba treaty kübok linük ana tsüngda ayongtzü amshiba nung osang agütsüteptsü asoshi tenangzüktepba yanglu. Ajisüaka iba treaty dak sendakba nung India aser Pakistan na mangatettep adoka arudar.
Sangtennü Shah-i ashiba agi, Chenab ayong nung 1000MW Pakal Dul aser 48MW Lower Kalnai hydroelectric projects dak sendakba nung Pakistan-i ashishiogo aser iba ken o ya iba senden nung jembishinütsü.
“Pakistan kübok aliba ayong nung tzünokdang yangluba dak sendakba nung tebilemtsü kaa onoki benokogo aser India-i kecha auh ta melei maneni kasa mapa inyakyong ao,” ta Saha-i ashiba den iba water project dak sendakba nung Pakistani ashishiba India-i telangzüba agütsütsü, ta ashi.
Taoba Pakistan Indus Water Commissioner Syed Jamaat Ali Shah-i PTI dang ashiba agi, taoba Pakistan sorkar anapronglai India den tzü tsütsü mangatettep adoka aliba kanga tongtibangsüa inyakogo.
“Iba dak sendakba nung India-i Pakistan kecha auh ta mali. Parnoki Pakistan nunger ayong nung hydro power projects yanglu tenzük aser Pakistan sorkari ashishiogo. Pakistan sorkari iba ken o süoki ia India den mejembira timtem asütsü,” ta pai ashi. Paisa Pakistan-i iba ken o World Bank nem agütsütsü nüngdaker, ta ashi.
Pakistan Water Commission ketdangser kati ashiba agi, Pakistan nungeri Chenab ayong nung 1000MW Pakal Dul aser 48MW Lower Kalnai hydroelectric projects design dak sendakba nung ashishia aruogo aser 1960 Indus Waters Treaty tetuyuba dak ajemdaker India nem design melenshidaktsüner mesera Islamabad temulung masü tashi New Delhi nem iba project minyakai atadaktsüner.