Industries & Commerce Dept.-i ketdangser den tepila sentong agi

Dimapur, Metsüremi/March 02 (TYO): Industries & Commerce Department indang Principal Secretary mapa nungi anenla, Lithrongla G. Chishi, IAS nem akhum agüja tepila sentong ka February 29, 2020 nü Hotel Japfu, Kohima nung agia liasü.
Lai department asoshi nendaka inyakba atema Director, Industries & Commerce, K. Hokishe Assumi-i mapa nungi anisüngzükla nem tenüngsang agütsü. Paisa mapa nungi anisüngzükla den külemi mapa inyakba indang lemsatep aser la ya nendaka aser meranga mapa inyakba tetsür ketdangser ka lir, ta ashi.
Iba sentong nung Imnatiba, Advisor of Industries & Commerce, Department ketdangser, NCS ketdangpur, IDAN züngsemtem aser Department kübok PSU ajak nungi ketdangpurtem dena liasü.
Lithrongla Chishi-i farewell address agütsüba mapang officer lanur ka ama lai mapa inyak tenzükba aser officer tetsür ka ama ajangshibatem bilemteta jembi.
La wadang nung takok anguba asoshi Tsüngrem nem tenüngsang agütsü aser la kinungbui la nungitba asoshia tenüngsang agütsü. La inyakba mapang takok balala anguba asoshi tejangra aliba aser tetangshi ketdangsertem nem tenüngsang agütsü. Department aser state tali renloktsü asoshi department nung inyaker ajak dang telungjem nung inyaktsü laisa ajungshia liasü.
Iba sentong nung Vitsutho Nyuthe, Joint Director of Industries & Commerce menden liasü.