Industries & Commerce-i Buyer-Seller meet ayonga agi

Kohima, Luchii/December 02 (TYO): December 2, 2018 nü Bamboo hall Kisama nung Department of Industries & Commerce den Indian Chamber of Commerce nati senteper Nagaland Buyer-Seller Meet ayongzüka agiogo, aser iba sentong nung tetushi tejaokerji Advisor, Industries & Commerce, Imnatiba Jamir liasü, ta ketdangsertem osang ka ajanga metetdaktsü.
Sentong nung jembidang tetushi tejaokeri kidanger linük balala nungi tejaokertem aser sentong nung shilem agirtem den Hornbill salema lemsatep.
Look east policy dak sendakba nung pai, South East Asian linüktem ya north east aser Nagaland nungi tenzüker aser iba ya south East Asia linüktem den sendaktepsü atema tongti corridor ka lir, ta metetdaktsü.
“Asenok ya backward ama züngshir, ibayongji special status category kübok lir, ajisüaka tashi aliba aser sempet aliba tsütsülenbo asenok backward masü,” ta pai metetdaktsü.
Paisa, item ama kidanger linüktem aser state tem den senden aliba ajanga bendangertem den tendaktep yanglutsü atema asen lanurtem aser entrepreneurs asoshi lenmang lapoktsütsü, ta metetdaktsü.
Iba dak sendakba nung pai tanga linüktem nungi tejaokertem aser tim departments nung ketdangsertm dang Kisama nung stall kiburtem den shisalemsatepa osang agitsü ajungshi.
Pai ashiba agi, asen aluyimertem dak-a tashi lir saka maongka aser market tsütsülen asenoki tangar memenep, kechiyong asen state nung marketing facilities peria mali.
Paisa, marketing aser storage facility den tayimtsü aser lenmang connectivity junga maliba ajanga asen rongsenkettsüng junga mainer, ta ashi.
Paisa, marketing system atema organisational support nüngdaker, iba denji külemi commercial shisatsü aser osangtsüsang agutsütsü nüngdaker, ta ashi.
Organic aluyimba dak sendakba nung pai asen nüburtem nem mozü mamshii aluyimba tesayuba agutsütsü nüngdak, kechiyong asen state nung ali nungi adokba rongsen peria moaja lir, ta ashi. Paisa department ketdangsertem dang schemes ajak junga benoka inyaka tajangzük angutsübur ket tongtsütsü ayongzük.
Sentong nung Commissioner & Secretary, Industries & Commerce, L. G Chishi-i lokti pelaa agizükba den tayongzükba o jembia liasü aser Regional Director, North East Indian Chamber of Commerce, Ishantor Sobhapandit-i okila jembia liasü.
Iba sentong nung Bangladesh, Imamuz Zaman of India- Bangladesh Chamber of Commerce & Industry, Chairman, Nepal Herbs & Herbal Products Association, Govinda Prasad Ghimire aser Bhutan Chamber of Commerce & Industry, Namgyel Wangmo nungeria jembi.
Director, Industries & Commerce, Er. S. Temsulong Jamir-i tepela anküp o jembia liasü. Iba sentong ya Deputy Director, ICC, Pranom Dutta Mazumdar leniba nung agi.