Infosys-i India nung ‘Infy Maker Awards’ angur 20 metetdaktsüogo

New Delhi, September 26 (Agencies): India nung kechisarena yanglutetertem tali ajungmesotsü atema Infosys-i Hombarnü India nung mezüngbuba ‘Infy Maker Awards’ angurtem metetdaktsüogo.

Iba tetoktepba nung adentsü atema company 2,500 shi-i tenüng agütsü saka 280 shimtetba rongnungi parnok 20-i ang takok angu. Item takokertem ya health, energy, education, sound & music, social change solutions, robotics, art & design, artificial intelligence aser electronics inyakyim nungi shimba lir. India nung ‘Infy Maker Awards’ ya tarutsü pututem atema purapiteter aser tajung teshisadangba alirtem ajateta adoka metettsü nükjidong nung akaba lir, ta Infosys Chief Operating Officer Pravin Rao-i sangdong ka ajanga metetdaktsü.

“Iba sentong ajanga India nung kechisarena yanglurtem dak tejangraba tali adoktsü aser oset tasen purapitetba tsütsü terenlok tulu alitsü onok teimla lir. Infosys-i iba amala sempet aketer kija aser lokti ajungmesoner,” ta Rao-i shisem. Tan takok angur 20 shia nem sen lakh pongungu (5 lakh each), marok kaka aser kuli kaket agütsütsü.

Iba award sentong ya June 2015 nung Barack Obama-i tenzükba “Nation of Makers” nungittsü atema Infosys Foundation USA-i US nung mezüng tenzük. “US nung iba sentong takok anguba ajanga India nunga taruba putu ajungmesotsü atema ‘Infy Maker Awards’ sentong ya akatsü lemtet,” ta Infosys Foundation CUS nung Mendenbuba, Vandana Sikka-i ashi.