Infosys nung inyaker tetsür ka tepset

Chennai, June 25 (Agencies) : Hokolbar nikongdang Infosys nung inyaker, arishi küm 24 tain, tetsür ka mapai oya-a lia Nungambakkam railway station, Chennai nung 6:30 ako nung rangseta südaktsü. La inyakba office ya Chennai nungi kilometre 60 pilar aliba Mahindra City nung lir.
La train ata lia nisung kati arur linok agi rangset, ta tenünk kuli angur kati ashi. Tan atalokba ya zünga hopta pezü tsüngda yimti nung nisung tepsetba trok buba ataloker asütsü. Nisung tepsetba trok rongnungi pongubo lokti aliba tesem nung atalok.
Nungambakkam station indang platform nung CCTV camera ka tanga mali, ajisüaka la tepsetsang aoba ajakji station tezülen aliba CCTV camera kar ajanga jangjaogo, ta police-i ashi.
“Tan asüla, Swathi ya lar medemer kati kanga timtem agüja liasü ta onoki jangjaogo. Lar medemer kati la den kibong akümtsü kanga asüngdang aser lai memulungba ajanga tashiyim agi kibong akümtsü ta amokmerenba, la den kanga anasatepa medemer kari onok dang shiogo. La tepsetsangji asangur ka liasü aser tena tera raratepba sülen pa yangkhu nung bena aliba linok ka atsüteter la rangset ta tenük kuli angur kati ashi,” ta police ketdangser kati metetdaktsü.
“La jena aotsü merang ajisüaka platform nung lao. La tekong aser tejak nung linok agi arangba tarak tarok liasü aser la yangjisa atanga asü,” ta kasa ketdangser jagi ashi.