Instagram nung Modi sülen anidaker timba lir

New Delhi, April 12 (Agencies): Bodhbarnü bushisüngdang ka ajanga ashiba agi, alima nung lenirtem rongnung Prime Minister Narendra Modi Facebook photo-sharing app Instagram nung tanidaker timtiba aliba lenir kümogo. Alima nung pa sülen anidaker million 6.8 lir.
Instagram nung yaküm küm Modi 3buba jenjang nung liasü. Tang adoktsüba osang nung US tir Donald Trump, Modi sülen tanabuba jenjang nung lir. Pa sülen anidaker million 6.3 lir, ta ‘global public relations firm Burson-Marsteller’-i bushisüngdangba nung ngutetba sangdonga liasü.
Iba bushidangba nung Alima nung linük lenir aser foreign minister tem 325 indang Instagram account taoba ita 12 asadanga liasü.
Modi-i pa indang account nung noksa 53 dang inoka liaka ‘photo-sharing app’ nung pa alima lenritem rongnung tajungtiba ta züngshir. Pai iba app nung inokba noksa ajanga nung shisa lemsatepa 223,000 shi alir.
“Alima nung lenirtemi alima loktiliba, yimten yimsüsübaren aser parnok kicha taküm indang online ajanga lemsateper. Shishilembaba nung aser tanga mapa nung lenirtemi Instagram amshiba parnok nungi angazüktsü akoktsü,” ta Burson-Marsteller CEO, Don Baer-i ashi.
Tasembuba jenjang nung White House account (million 3.4) jakdang Pope Francis lir. Pa sülen anidaker million 3.7 lir.
Taoba ita 12 tsüngda nung shilem 673 agi renloka Indonesia tir Joko Widodo 5buba jenjang tongogo. Pa sülen anidaker ajak agi million 3.4 lir.
Post asüba shia shisalemsatepa ren nung Turkey tir Recep Tayyip Erdogan tanabuba jenjang nung lir. Pai post asüba shia shisalemsatep 141,000 shi alir. Pope Francis Instagram post tem nunga shisalemsatep 138,000 shibo alir.
“2017 April ka tashi nung account ajak senteper tanidaker million 48.7 aser post 61,281 süogo. Taoba ita 12 tsüngda nung item account nung post tem dak ajemdaker shisalemsatepba million 371.7 liasü,” ta osang ajanga metetdaktsü.