Instagram nung voice aser video calling angutsü akok

Metsüremi 03, 2018 (Agencies): Nungtugu photo sharing app Instagram nung feature tasemtem inoktsütsü merangdar. Osang tasen ka sangdongba shidak süra, iba app nung voice aser video calling angutsü. “Call” aser “Video Call” atema Android Application Package (APKs) iba app ajanga amshiba angu, ta TechCrunch-i sangdong ajanga metetdaktsü, saka item feature ya kodang iba app nung sayatsüar mejangja. Ajisüaka, Instagram asoshi ‘Direct messaging system’ agütsütsü akok.
Instagram app nung video call button ka nguogo, ta Aenjeti (January) sangdong ka ajanga metetdakja liasü. Tawa adokba olulu dak sendakba nung Instagram spokesperson-i kecha telangzüba magütsü, ta TechCrunch sangdong ajangasa metetdaktsü.
Tawa Instagram-i Giphy GIF sharing feature sayaogo aser taoba küm iba app ya APK ka nung sayua liasü. Iba voice aser video calling feature tem ajanga, Instagram-i parnok den tokteper tulutiba Snapchat den tokteptsü akok.
Kanga dang meimlai ka Instagram-i ‘video feature’ atema mapang aser rongsen na indoka lir. Ita ishika tejaklen iba app nung Live Video engagement tsütsü ajungketsü asoshi feature tasen ka saya liasü. Facebook meyong photo sharing app ajanga tamshirtemi Instagram ‘Direct’ feature amshia Live Video invitation medemer dangi yoktettsü. Iba asoshi ‘Direct icon’ button nungji dang anemtsü nüngdaker aser ibaji ajanga tamshirtemi Live Video tem reprangba mesüra live video yangluba tem tangar dangi yoktettsü.