Int. player Chaliha-i Mkg nung badminton coaching agütsür

Coach Pradip Chaliha den coaching nung adener aser MDBA ketdangsürtem külemi tangokba noksa nung angur. Mokokchung, June 15, 2017.

Mokokchung, June 15 (TYO): Mokokchung District Badminton Association (MDBA)-i ayongzüka yangi Mokokchung Indoor Stadium nung June 15 nungi June 30 tashi agitsüba badminton coaching camp sentong ka tenzükogo. Iba ama international player ka arua coaching agütsübajibo Mokokchung nung ibai mezüngbuba asütsü, ta angazüker.
Iba sentong nung taoba International player Pradip Chaliha-i tongti shilem agia Badminton dak sentakba nung tesayuba balala agütsütsü. Pa denji ano liso Badminton asayar Bendangnochet aser Temsüyanger nati yariteptsü. Iba camp ya ‘Yonex Zükshi Shitsü Sports’-i yaria ayongzüker.
Iba camp nung ya tejen player-tem, tasen arur tejangrartem ta telok balala küma lemsar tesayuba agütsütsü ta MDBA ketdangsürtemi osangbener senden ka Indoor stadium nung akadang ashi. Iba coaching camp ya talisa lanur sempet aketertem bushiba den tang aruya aliba Nagaland Inter-District asayamung nung shilem agitsüpur nem tesayuba agütsütsü nükjidong nung ayongba lir, ta parnokisa ashi.
Taoba mapangbo North-East nungi badminton asayar tajung aika adoka liasü, saka tanübo ajema kümogo, ibaji asenok dak sempet maliba agi masü saka temulung magütsüba ajanga lir, ta Pradip Chaliha-i kuli kar ashi. “Lanurtem nem tim lenmang sayua anitentsübaji kanga nüngdaker”, ta paisa inyakdaktsünüba olen ka ashi.
Paisa badminton asaya ngujem aser tongtibang indang kar lemsatepdang, India nung badminton asaya ya kanga nüngtugu kümogo, badminton asayaba ajanga mapa aser maongka anguba aika lir, ta ashi. Tongtibangsa Olympic nung India tsür Saina Nehwal-i bronze medal anguba aser Pursala Sindhu-i Silver nguteta linük nem tenüng tajung bener arutsüba sülen ano iba asaya ya tali nüngtuguba aküm, ta paisa shisem.
Saisaponger ka dak lidaktsünüba noklem (qualities) kar ashidang, bendanga agütsüba, temulungtetba aser tazüokbaji asayar ka dak alitsü kanga nüngdaker. Iba den ano asayar ka ajungkettsübaji tsürabur aser asaya achayanger association daka tuluka keta lir, ta paisa shisem.
“Asenoki badminton asaya ya nüngtugu kümdaktsüdi aser iba camp sülen asayar tajung aika adoktsü imlaa atar, ta Pradip-isa shisem.
Mokokchung ya mapa tasen tenzükba lima ka lir, iba denji yangi nungi asayar tajung aika adoker aser yangi Association kanga tashi ita aliba ngua iba ama tesem ka nung coaching camp alitsübaji nüngdaker ta ajiteta iba camp ayongba nung shilem agia yariteper, ta Yonex Zükshi Shitsü Sports kibur Tali Jamiri ashi.
Tang coaching akaba süngjang ya tang-tangbo matangtsü akok, saka kenübo iba süngjang ya atangtsü imlar, ta paisa ashi. International level tashi nung shilem agitettsüsa Naga nunger dak sempet lir aser aji asenoki inyaktettsü, aser asayar ka akümtsü asoshi tazüngba tulu menüngdaker, ta paisa shisem.