Inter Dist. & State Open Badminton Championship tembangogo

Dimapur, August 29 (TYO): 40 buba Yonex Sunrise Nagaland Inter District & State Open Badminton Championship tan August ita 27 nü Jalukie nung tembanga asayaogo.
Asayamong tembangba sentong nung Nagaland Parliamentary Secretary, YRS, MTF & Lotteries, Khriehu Liezietsu tongti tesemdanger liasü.
“India’er tetsür badminton asayar, PV Sindhu-i tawa tembangba Rio Olympics nung silver medal agizükba ajanga lai badminton asayartem ajunga tenüng nung India nem konang tulu bener arutsüogo. Asen lokti tentet nung saisapongtsü ya tongti shilem ka lir aser saisapongtsü sabang nung shilem agiba ajanga nüburtem rong nung jakla yimya aser tangatetba tajung bener arutsür,” ta tongti tesemdanger-i metetdaktsü.
“Nagaland Badminton Association (NBA) Tir, Minister Vikheho Swu lenisüba kübok tan asayamong takok ngua agiba atema yimsüsürsang nem tenüngsang agütsür. Asen state nung badminton sabang temaba jenjang nung ajungkettsütsü atema sorkari nungdakba saisapongtsü ki o jen aser osettsüset renemtsütsü alizüng yua lir,” ta pai shisem.
Tan asayamong kübok Junior tetoktepba nung Mokokchung telok champion aküm aser Wokha teloki tanabuba jenjang ajangzük.
Ano, Senior tetoktepba nung Nagaland Police telok champion aküm aser Kohima teloki tanabuba jenjang ajangzüka liasü.