Inter-District Catch Them Young asayamung tembangogo

Dimapur, Mongputeni/October 18 (TYO): 12buba Inter-District Catch Them Young Tournament shibangba sentong IG Stadium Meriema, Kohima nung October 18 nü agiogo.
Alakteta jaoker aser Secretary YRS, Alun Hangsing shiba iba sentong nung dena liasü, pai ashiba agi, saisapong balala nung shilem agiba ajanga temang nung timtem balala aliba kokteter aser taküm nung mapa ajak rangloker inyaktsü asoshi teyari agütsür, ta ashi. Paisa, saisapong ajanga temang anema toktsür aser iba ya education nung tongtibang shilem ka kümogo; saisapong nung tetsükdaktsü balala ajuruba ajanga taküm nung tetsüdaktsü ajangteter. Shidakba saisaponger kati tajungtiba agi asayar temakok nguaka tamakok agizükteter aser iba ajanga yimyayimpong renloka aoba nung teyari agütsür, ta ashi.
Hangsing-isa, saisapong nung career yanglutsüji kanga tajung aser lenmang sadema lapoka lir, ajisüaka career atema dang masü saka pei temang asoshi asaya balala nung shilem agitsüla, ta ashi.
Football Scouts, Nikhil aser Sumit nati Bhaichung Bhutia School Delhi nung training agütsütsü atema asayar 15 shimogo (Goal Keeper 2, Defender 5, mid Filder 5 aser attacker 3). Maneni October 21 nü coach tem atema coaching agütsütsü aser iba sülen team nung shilem ka ama parnok pezü shimtsü.
Director YR&S, Akumla Chuba-i ashiba agi, Catch Them Young Tournament ya 1974 küm “Catch them young and teach them right” omen nung ajemdaker tenzük aser iba mapang football aser athletics dang asaya, saka Department-i taruba kümtem nung wrestling, boxing, badminton aser taekwondo inoksemtsü inyakdar. Laisa, department-i district ajak nungi asayar tajungtiba tem shima maneni training agütsütsü, ta ashi.
Asayamung nung Dimapur District-i gold 5, silver 2 aser bronze 3 nguteta point timba ngutetogo. Tebur football asaya final nung Kiphire district-i goal ka agi Tuensang koka liasü. Iba asayamung nung district 11 nungi asayar 290-i shilem agiogo aser parnok rongnung tetsür 75 aser tebur 215 densema liasü.
Inter-District asayamung ya Advisor YR&S, Er. Zale Neikha-i tenzüktsü. Asayamung shibangba sentong ya Deputy Director, Teisobou Sekhose lenisüba kübok aka aser Additional Director, Rato Pusa-i tepela anküp o jembi. Taküm Catch Them Young asayamung ya YR&S department-i ayongzüka kanga takok nung tembangogo, ta ketdangser sangdong ka ajanga metetdaktsü.