Inter District cum Open TT C’ship tenzükogo

Kohima, Mongputeni/October 17 (TYO): Nagaland Table Tennis Association (NTTA)-i ayonga Kohima DTTA-i host asüba 23buba Inter District cum Nagaland Open Table Tennis Championship Indoor TT Stadium nung tanü tenzükogo.
Iba asayamung nung Dimapur, Kohima, Mokokchung, Wokha, Phek, Zunheboto, Mon aser Peren nungi asayar 80-i Inter District championship team event aser open category nung shilem agidar.
Asayamung lapokba sentong nung o jembidang Advisor for Youth Resources & Sports, Zale Neikha-i, Naga nunger ya tangar dang nungi tekübokba masü aser saisapong balala nung temaba jenjang tongtettsü asoshi sempet lir, ta ashi.
“Naga nungertemi asenok asoajen den apet asaya meshimteter aser saisapong ajak nung shilem agir, koba ajanga asaya ka nung alakteta tajung mekümteter,” ta Neikha-i ashi.
Kasa mapang nung Naga nungertemi chiyongtsü tim machir ta shia paisa, “Naga nunger asayartemi temang anepalu masür saer training shidak magir,” ta ashi.
Neikha-isa, Naga nungertemi education ajanga dang mapa agütsütsü ta bilemer aser iba ajanga saisapong yaa asenok asoshi konang tetushi bener arutsütsü atema lenmang ka lir ta amadoker.
O jembidang pai Chekrovolu Swuro ateshia jembi, lai bendanga agüja asayaba aser takok ajanga la Deputy Superintendent of Police mapa nguogo aser kasa mapang nung Mary Kom aser athlete Hima Das nungeria saisapong ajanga takok tajung ngutetogo, ta ashi.
Tejen tebilemdangba tem toktsür asayar tajung akümtsü asoshi mangdang ulushitsü pai ajungshi. Maneni pai asayartem dang iba asayamung nung pei dak aketba sempet tajungtiba agi asayatsü ajungshi.
Asayamung lapokba sentong ya Kethose Chüzho lenisüba kübok aka aser SABAK pastor Rev Kiyeto Sema-i temoatsü meshia sarasadem. Maneni sentong nung NTTA vice president Kezhaletuo Meze-i tepela o jembi aser Keneisenuo Sorhie o Sede Belho nati ken aten.
Iba asayamung ya Rogonü tembangtsü.