Inter-Ministerial Central Team-i Dr. Shürhozelie den ajurutep

Dimapur, April 17 (TYO): Inter-Ministerial Central Team (IMCT) den Nagaland State Disaster Management Association (NSDMA) ketdangsertemi Hombarnü Chief Minister, Dr. Shürhozelie Liezietsu den pa indang residential office nung ajurutepa senden ka amen.
2016 nung Nagaland nung tzümetsüng/anenstüh lendongtem atalokba dak sendakba reprangshimtsü atema IMCT-i state semdanger, ta Media Cell, Chief Minister’s Office, Nagaland sangdong ka nung metetdaktsü.
Central team aser State Disaster Management ketdangsertemi Chief Minister dang state nung lendong balala ajanga teraksa bener arutsüba osang metetdaktsü aser power point presentation ka sayu.
Dr. Shürhozelie-i IMCt telok dang Nagaland semdangba atema pelaba metetdaktsü.
Nagaland ya state tila ka dang saka khuret peria dang lir. Nagaland nung rongsen peria maliba janga Centre dak dang metaloker alir aser alima lendongtem atalokdang state senpong nungi sen agiteta amshitsüa akümer, ta paisa ashi.
“Kidangsüa aliba state tem dang nungi Nagaland nung anentsüh kanga bulua ataloker. Nagaland nung tzünglu aruba ajanga Brahmaputra ayong nung tzümetsüng ajurur. Ajisüaka, Nagaland nung tzünglu aruba indang khuret süa mebilemer, saka tzünglu janga tsünüsenbongtsü raksatsüba den gari lenmangtem raksatsür. Nenok tonga arua osang metetpelaba atema kanga pelar,” ta Dr. Shürhozelie-isa Centre nung aruba telok dang ashi.
IMCT telok nung lennirji Joint Secretary (Police-1) MHA, Kumar Alok lir aser züngsemtemji Director, Department of Agriculture, Co-operation and Farmers Welfare Kolkata, Dr. Manoharan, Joint Director Department of Expenditure, Ministry of Finance Delhi, S.C. Meena, AD (H) Department of Rural Development, Delhi, Mohit Verma aser Executive Engineer, Ministry of Road Transport and Highways, Guwahati, Sachin Kumar Gautam nungertem lir.
Tanü Chief Minister den senden amendang Chief Secretary, Pankaj Kumar. Additional Chief Secretary, Temjen Toy aser tongti ketdangsertem aden.