Interim manager asütsü United puri Ole Gunnar shim

Luchii/December 19, 2018 (Agencies): Manchester United puri 2018-19 season matem tashi interim manager asütsü atema taoba United asayar Ole Gunnar Solskjaer shimba Rasemnü metetdaktsüogo. Pa taoba mapang külem asayar Mike Phelan, first-team coach aser Michael Carrick o Kieran McKenna nunger den longjemtsü, shirnoki taoba mapang inyakba aliba mapa maneni belenzüka inyaktsü.
Solskjær first team coach mapa belenzüka inyaktsü aser club-i full-time manager tasen ka meshim tashi pai iba mapa bena atatsü, ta Manchester United sangdong ka ajanga metetdaktsü.
“Manchester United ya kü mulungjang lir aser iba club-i tanaben meyipa aruba atema kanga pelar. Ni sempet tajung aketba asayartem aser staff den külemi club den sendaka aliba nisung ajak den inyaktsü yongyaa atar,” ta Solskjær-i ashi.
Solskjaer, shiba tang Norway club FC Molde manager mapa inyakdar pa Jose Mourinho mapa nungi anentsüba sülen interim post atema shimtsü asoshi asadangba nisungtem rongnung ajaki saklokba nübu ka liasü. Norwegian league Yimpoksüi/Nov nung tembangba sülen pa taruba küm season tasen Metsüremi/March metenzük tashi azünga lir. Sir Alex Ferguson lenisüba kübok 1996 nungi 2007 tashi asayaba mapang pai United nungi 366 ben asayaogo aser goal 126 idaktsüja lir. 2008 küm pa club indang reserve-team manager aküm aser iba sülen FC Molde indang manager mapa belenzüka inyak tenzük.
United pur tang Premier League nung jenjang trokbuba nung lir aser küm 28 tsüngda iba season tamajungtiba tenzükogo.