Interlocutor RN Ravi-i UNC lennirtem den ajurutep

Dimapur, November 15 (TYO): Narendra Modi-i Naga yimten ken o tembangnüba atema aser ano iba ken o atema kidanger state tem den onük kar aliba angatetteptsü atema Naga Peace Talks atema Interlocutor R.N Ravi-i United Naga Council (UNC) Manipur lennirtem den senden ka amen.
UNC ya Manipur nung Naga kintem indang tongti telok lir aser November 15 nü Kohima nung parnok den sendenji amen, ta OSD to R.N. Ravi, Gurmeet Singh-i tanü sangdong ka nung metetdaktsü.
Senden nung UNC lennirtem dang yimjung olemtep agia aruba indang osang metetdaktsü aser telok balala den jembiba onüktem lemsatep. Maneni, UNC lennirtemi tasüngdangba balala asüngdangbatem jangjatsü, ta OSD Gurmeet Singh-ia ashi.
Naga yimten tebilemtsü joko tembangtsü mapang ka nung Manipur nung aliba Naga kintemi külem sensotem den tesentaktep tajung ayutsüla ta UNC lennirtem dang ashi.
Manipur nung tenem aser lenden nung alirtem tsüngda tesentaktep mejungi akümba atema RN Ravi-i tebilemtsü abenba lemsatep. Manipur nung tenem aser lenden nung alirtem tsüngda akhi ama tesentaktep tajung yanglushitsüla, ta paisa ayongzük.
Kidangertem dena, iba ken o dak sendaktepa alir ajak den tangatettep kati marura, Naga yimten tebilemtsü ya mekoktettsü, ta RN Ravi-isa ashi.
Paisa UNC lennirtem dang lenden nung alirtem den temeim aser tangatetba tajung nung tesentaktep yanglutsü atema ayongzük, ta OSD Gurmeet Singh-isa metetdaktsü.