Interlocutor RN Ravi Kohima nung arua lir

Kohima, Aug 26 (TYO) : Naga yimten latettsü asoshi India tenüng nung NSCN-IM den jembisang, Wb.R.N.Ravi tanü nikongdang Kohima tonga aruogo aser pa tonga aruli nungi Naga nunger lokti tentet lenirtem ajurua shisalemsateptsü tenzükogo.

August 3, 2015 nü India sorkar o NSCN-IM na tsüngda Naga yimten latettsü asoshi tangatettep ken o kar renemba sülen tang mezüngbuba  Ravi Nagaland tonga arur.

Tanü nikongdang pa aruba sülen pai Naga Hoho aser Naga Students’ Federation (NSF) lenirtem de Oriental Grand hotel nung ajuruogo.

Iba senden temer külen osangbenertem den jembidang, Naga Hoho tir, P. Chuba Ozukumi ashiba agi, Centre tenüng nung jembir, Ravii NSCN-IM aser center sorkar na tsüngda “Framework Agreement” yangluba dak aketba ken o kar lemsatepdang, center sorkari Naga nunger mera akettsüsa aser teti India o Naga nunger na külemi yimjung nung litettsüsa Naga yimten tebilemtsü ken o ya renemtsü bilemdagi ta metetdaktsüogo.

Ravii Naga Hoho lenir dang center sorkari Naga yimten ken o ya tangar dang nungi kenyongi balaka ta angateta lir, anungji yimten latetdang yimten tashi lemsatsü aser tangbo khen nung dang teti atema telemtetba agitsü merangtsü ta shiogo ta Chuba Ozükümisa metetdaktsü.

Raviisa “Pan-Naga Council” ya temzüng ozüng amshitsü tashi aliba tentet ka asütsü saka ano inyakyim melatet ta metetdaktsüogo ta Naga Hoho lenirisa ashi.

Chuba Ozükümisa ashiba agi, Naga Hoho tenüng nung Ravi dang Naga yimten telemtetba nung Naga nunger telok ajak adentsüla ta metetdaktsüogo.

Onokisa Naga nunger lushi ajak Naga yimten küboki aittsüla aser arrtsü jungjunga ladangtsü atema Ravi nem metetdaktsüogo ta Naga Hoho lenirisa ashi.

Ano, Naga Hohoisa Nagaland nungi Disturbed Area ozüng agientsü asoshia Ravi dang metetdaktsüogo.

Iba osang zülu tashi nung NSF lenirtem Ravi den liasü.

Brehostibar anepdang Ravi-i 8:30 ako nungi Eastern Nagaland Students’ Federation (ENSF), Eastern Nagaland Women Organisation (ENWO), Eastern Nagaland People’s Organisation (ENPO) aser Naga Mothers’ Association (NMA) purtem ajurutsü aser nikongtsütsü Forum for Naga Reconciliation, Nagaland Baptist Church Council aser Nagaland GBs Federation purtem ajurutsü sentong lir.