International Football asayatsüren toktsütsü lemtetogo: Toure

Manchester, September 20 (Agencies): Taoba mapang African Footballer of the Year sempet 4 ben tashi agizüker, Yaya Toure-i international football asayatsüren nung joko shilem magitsü lemtetba osang ka tanü, Mongolbar nü sangoktsüogo.
Britain nung tentetba tongti football asayatsü telok, Manchester City telok tenüng nung midfield asayar, Toure-i international asaya nung ajak agi goal 113 tashi takok ngua agüja asayaba sülen tan international asayatsürenji toktsütsü lemteter lir.
“Ni mapang talangka shisadanga aruba sülen international football asayatem nung joko shilem magitsü telemtetba tatem küma agiogo,” ta arishi küm 33 tain Toure-i metetdaktsü.
“Ni küm 14 tashi temaba jenjang nung asayaogo aser tan tapet mapang nung international asaya toktsütsü telemtetba agir lir,” ta Ivory Coast nunger Toure-i shisem.