International Space Station tajungba küma yanglushitsü tenzükogo

March 26, 2017 : Anünglak nung aliba International Space Station tajungba küma yanglushitsü asoshi anünglak nung senzür ana iba tesem meketa Hokolbarnü ghonda 6 dak tali jajaogo.
Alima nungi kilometre 402 pilar sen dollar billion 100 agi yanglua aliba International Space Station tema nung US nunger arishi küm 49 tain, station commander, Shane Kimbrough aser France nunger arishi küm 39 tain, flight engineer Thomas Pesquet, nati jaja.
Kimbrough ya anünglak nung punguben buba jajar aser pai International Space Station indang ‘central beam’ nung aliba ‘computer relay box’ ya yanglushi. Iba sülen Boeing & Space Exploration Technologies mesüra SpaceX ajanga anünglak tayimtsü anentsü asoshi tesem tasen yangluba nung mapa kar inyak.
Tang ya International Space Station-i Russia nungertemi nisungtem anir atutsü asoshi sentong yangluba mapang ka lir. Nija company balala temi 2018 küm tatemlen tashi nung iba station-i nisung anir atutsü teimla nung US National Aeronautics & Space Administration (NASA) ajanga iba station yanglushi tenzükogo. International Space Station-i nisung ka anir atuba nung NASA sen dollar million 80 indoktsü.
Anünglaki nisung anir atuba ‘space taxi’ nung nisung memeni taküm küm tatemlen tendanga yokdangtsü sentong lir. Iba ‘commercial space taxi’ temi amshitsü asoshi Kimbrough-i Hokolbar anogo nung ‘cable’ pezü salazük. ‘Ground control team’ station indang ‘robot arm’ amshia iba cable ya tesem tangai bener aotsü.
Pesquet aser NASA indang astronaut Peggy Whitson nati Brehostibarnü anünglak nung jaja-a ‘cable’ tasen kar inoktsü sentong lir.
Nisung anir anünglaki atuba anentsü asoshi tang teyangludak mapa renemba sülen US nunger indang anünglaki atuba tayimtsü anendak tesem ana aser oset bener atuba tayimtsü anendak ana akümtsü. Iba station ya Russia aser US külemi amshir aser Russia nunger anünglaki atuba tayimtsü anendak tesem pungu iba International Space Station nung lir.